Barazimet në modë në çerekfinalet e Europa League. Vetëm Braga ia ka dalë të fitojë, me rezultatin minimal 1-0 kundër skocezëve të Rangers. Goli i Ruiz në minutën e 40-të mjaftoi për portugezët, që kishin shënuar edhe në minutën e 26-të me Horta dhe VAR ua kishte prishur festën për faull.
Spektakël pati në duelin Eintracht Frankfurt-Barcelona, që përfundoi 1-1. Katalanasit dhanë sinjalin e parë me Ferran Torres, kurse më pas Djibril Sow për pak sa nuk kaloi në epërsi gjermanët. Në pjesën e parë provoi edhe Aubamyeang për Barcelonën.
Në minutën e 39-të spanjollët shpëtuan nga VAR, pasi një penallti e akorduar u anulua. 0-0 në 45 minuta dhe e dyta nisi “zjarr” për Eintracht, që për tre minuta shënoi me atë në Knauff. Minuta të mira për vendasit, që iu afruan golit të dytë me Lindstrom dy minuta më pas.
Me fat Barcelona, që reagoi dhe pas kombinimeve perfektë shënoi me Ferran Torres golin e barazimit. Nga minuta e 78-të Eintracht luajti me një lojtar më pak, pasi Tuta mori kartonin e dytë të verdhë.
Pavarësisht kësaj, gjermanët kishin rastin më të mirë të shënimit deri në fund, por N’Dicka e çoi topin ngjitur me shtyllën pingule. 1-1 përfundoi i gjithë takimi, ashtu sikurse edhe West Ham-Lyon.
Francezët ishin ata që komanduan lojën, por nuk fituan dot edhe pse 45 minutat e dyta luajtën me një lojtar më shumë pas ndëshkimit të Cresswell me të kuq. “Çekiçët” gjithsesi ia dolën të shënojnë të parët me Bowen, por festuan pak. Ndombele barazoi, ndërkohë Lyon nuk mundi dot ta shënonte edhe golin e fitores në vazhdim.
Discussion about this post