Egnatia dhe Dinamo në sfidat europiane, UEFA cakton gjyqtarët

UEFA ka publikuar emrat e arbitrave që do të ndajnë drejtësinë në ndeshjet e radhës të klubeve shqiptare në arenën europiane.

Egnatia dhe Dinamo kanë mësuar gjyqtarët që do të drejtojnë sfidat e tyre në turin e tretë kualifikues.

Ndeshja mes Shamrock Rovers dhe Egnatias, e planifikuar më 4 gusht në Dublin, do të gjykohet nga letonezi Andris Treimanis.

Për 41-vjeçarin nuk është sfida e parë europiane e sezonit, pasi më herët është caktuar edhe në përballjen mes Heart of Midlothian dhe Sturm Graz në kualifikueset e Champions League.

Ndërkohë, dueli mes Auda dhe Dinamos në Conference League i është besuar arbitrit spanjoll Jose Luis Munuera Montero.

43-vjeçari konsiderohet një nga gjyqtarët më të vlerësuar në Spanjë dhe sezonin e kaluar drejtoi sfida të nivelit të lartë, mes tyre edhe derbin mes Real Madrid dhe Atlético Madrid.

Caktimi i Munuera Monteros shihet si një tregues i rëndësisë që UEFA i ka dhënë këtij takimi, ndërsa ekipet shqiptare synojnë të hedhin një tjetër hap drejt fazës së grupeve të kompeticioneve europiane.