Më në fund pritja për rikthimin në Kategorinë Superiore mori fund për tifozët e Dinamos dhe duke nisur nga sezoni i ardhshëm ata do të kenë sërish mundësinë për të parë ekipin e tyre të zemrës në elitën e futbollit shqiptar. “Nëndetsja blu” duket më e fortë se kurrë tashmë, sidomos me ndryshimin në presidencë, ku tashmë drejtimin e klubit e ka marrë Ardian Bardhi.
Sipas burimeve të Gijotinës, ekipi tiranas ka përzgjedhur dhe trajnerin e ri pas largimit të Olsi Ukut. Mësohet se në stolin e Dinamos do të ulet Bledi Shkëmbi dhe zëvendëstrajner do të jetë Francesko Vitobelo.
Kjo do të jetë aventura e dytë në rolin e trajnerit për korçarin, i cili ka drejtuar për afro një vit e gjysmë ekipin e Teutës nga qershori i vitit 2018 deri në dhjetor të 2019, ku sërish bashkëpunoi me Bardhin, i cili gjithashtu ishte pjesë e durrsakëve në atë kohë.
