Partizani kërkon t’ia marrë “yjet”, por Shkëndija duket se i ka marrë masat dhe i shtrëngon fort lojtarët e vet më të mirë. “Demat” janë prej javësh në kërkim të një qendërsulmuesi të nivelit të lartë dhe Sindrit Guri është padyshim lojtari më i preferuar për këtë pozicion.
Të kuqtë e duan me ngulm ish-sulmuesin e Kukësit e Vllaznisë dhe janë vënë në veprim për të siguruar shërbimet e tij që në muajin qershor. Prej ditësh është përfolur në lidhje me një transferim të mundshëm të sulmuesit në anën e kuqe të kryeqytetit, por duket se kjo lëvizje është e vështirë të përmbyllet me sukses.
PRAPASKENAT – Burime pranë klubit të Partizanit bëjnë me dije se drejtori sportiv, Elton Marini, është takuar kokë më kokë me Gurin. Ai i ka shprehur 28-vjeçarit dëshirën e madhe për ta afruar te Partizani, madje mësohet se të kuqtë kanë bërë edhe ofertën financiare të tyre kundrejt lojtarit. Guri nga ana e tij nuk e ka dhënë një përgjigje përfundimtare, por ka qenë i hapur për një transferim të mundshëm te Partizani.
Guri ka pasur një problem me ultrasit e skuadrës, por koha dhe suksesi shëron gjithçka. Shkodrani ka shënuar 2 gola shumë të rëndë në Ligën e Konferencës për ta dërguar Shkëndijën në turin e tretë, ku e presin suedezët e AIK-ut.
Ecuria e mirë në Europë e shtyn Shkëndijën të aplikojë rinovimin e Gurit edhe për një sezon tjetër, duke lënë “thatë” Partizanin. Gjithsesi, deri kur gjithçka të jetë zyrtare, nuk përjashtohet asnjë skenar.
Kujtojmë se Bruno Dita ishte një tjetër lojtar i kërkuar nga partizani, por Shkëndija vuri në zbatim klauzolën e rinovimit.
Discussion about this post