Ekspertët thonë se në vendin tonë është shtuar ndjeshëm numri i personave që përdorin lëndë narkotike. Krahas numrit të përgjithshëm është shtuar edhe numri i adoleshentëve që përdorin drogëra, ndërsa rastet e varësisë vërehen që tek moshat 11 vjeç. Përdorimi i drogave nga adoleshentët është shndërruar në një fenomen mjaft shqetësues.
Mjekja toksikologe Miga Maktraku tregon se fatkeqësisht ka një numër në rritje të personave të cilët përdorin apo janë konsumues të lëndëve narkotike në Elbasan. Më shqetësuese bëhet situate kur sipas mjekes përdorues të lëndëve narkotike janë edhe fëmijët.
“Për fat të keq numri i personave që bien pre e përdorimit të këtyre substancave është gjithmonë në rritje. Numri i familjarëve që vijnë që kërkojnë ndihmë për të afërmit e tyre është në rritje. Grupmosha më e madhe janë adoleshentë dhe paraadoleshentë.”
Sipas ekspertëve shkaqet për shtimin e numrit të përdoruesve të drogës janë të ndryshme, mes tyre kureshtja, nevoja për të harruar, çrregullimet psikologjike, ndjenja e fajit apo edhe shihet si një formë për të lehtësuar dhimbjet.
“Shtysat dhe motivet që e çojnë dikë nga droga janë të ndryshme. Kryesisht fillon me kuriozitetin dhe eksperimentojnë. Bien pre edhe nga presioni shoqëror.”
Në vendin tonë ekziston vetëm një qendër rehabilitimi për personat që kanë varësi nga lëndët narkotike, ndërsa ekspertët thonë se vetëm një e tillë nuk mjafton, duke pasur parasysh shtimin e numrit të përdoruesve.
Discussion about this post