Mësimi i gjuhës angleze në klasat e para të shkollave në rrethe ka për të dështuar, thotë eksperti i arsimit, Qemal Çejku, pasi në disa qarqe ka mungesë të theksuar të mësuesve të anglishtes.
Sipas tij, nisja e mësimit që në klasë të parë më shumë po i penalizon se sa po i ndihmon nxënësit, për shkak se janë të mbingarkuar dhe të pamundur të përqendrohen në aq shumë detyra. Ai tha se ata fëmijë që ecin me orë të tëra për të shkuar në shkollë, edhe po të kenë një mësuese anglishte e kanë të vështirë të implementohen për shkak se kjo është një barrë shtesë për të gjithë nxënësit.
Për herë të parë në vendin tonë, në këtë vit të ri shkollor anglishtja u fut si lënë që në klasën e parë, ndërsa deri në vitin që lamë pas nxënësit e fillonin anglishte në klasë të tretë. Edhe prindërit janë të dyzuar, ka nga ata që e vlerësojnë këtë vendim, por për disa prindër të tjerë kjo ngarkesë është e tepërt për shkak se fëmijët e klasës së parë duan kohë të ambientohen me shkollën dhe rregullat e mësimit dhe nuk mund të përballojnë shtesa të tjera.
