Eksperti i Arsimit, Ndriçim Mehmeti, i ka dhënë një “shuplakë” shumë të fortë qeverisë duke thënë se rrogat për mësuesit dhe edukatoret janë më të ulëta se rroga e një punonjëse sanitare në QSUT.
Ai ka renditur shumë problematika, të cilat hasin në arsim sot, duke nisur nga infrastruktura shkollore e deri te mungesa e trajnimeve për mësuesit.
“Jemi të përgatitur në nivel pedagogjik, por jemi të papërgatitur në sistemin 12-vjeçar. Në këtë sistem vuajmë disa probleme shumë të mëdha. Kemi infrastrukturë të dobët shkollore, nuk kemi shkolla të digjitalizuara që t’u përgjigjen zhvillimeve, që janë sot Inteligjenca Artificiale dhe të teknologjisë së informacionit dhe komunikimit.
Siç e pamë në studimin e fundit, ne kishim koeficientin e inteligjencës më të ulëtin në Ballkan dhe Europë. Kemi mësues të papërgatitur pasi nuk ka trajnime efektive, nuk kemi mësues të përgatitur të arsimit special. Po përpiqemi, por jo në ato nivele që do të dëshironim për fëmijët me aftësi dhe nevoja ndryshe.
Kemi paga jomotivuese. Rroga mesatare nuk është në fakt 900 euro, pasi në sistemin 12-vjeçar marrin 680 euro maksimumi ai që ka vite të shumta pune. E të mos harrojmë që edukatoret e kopshtit dhe mësuesit e arsimit fillor, marrin paga qesharake. Pagat e kopshtit janë më të ulëta se sanitaret e QSUT-së që marrin 52 mijë lekë, ndërsa në kopsht mesatarisht marrin 44 deri në 46 mijë lekë. Në arsimin fillor maksimumi marrin 630 euro në muaj”, tha Mehmeti
Po ashtu përmendi edhe dështimin me kartën e studentit, ku me nota ironie u shpreh se është e pavlefshme pasi u bë për të blerë mish e gogozhare apo për të shkuar në servis a thua se studentët të gjithë kanë “Ferrari” e nuk kanë ku ta riparojnë.
“Pakti i Univeristetit ka shkelje ligjore për të cilat nuk përgjigjet askush. Kryeministri deklaroi se me urdhër të tij do të mblidhej GNP-ja që është Grupi Ndërinstitucional i Punës, i cili në mars 2019 duhet të përfundonte hartimin e të gjithë projektit të fizibilitetit dhe projektit të ndërtimit të kampusit të Tiranës, nuk u bë. Do të bëjmë një kampus në Durrës, nuk u bë. I vetmi univeristet në Europë që s’ka fjetina. Pakti për Universitetin u shkërmoq. Po të shohim shpenzimet e një studenti këtu janë shumë më të larta se në shtete të tjera. Një i ri edhe po të shkojë në fjetinat e qytetit Studenti duhet të paguajë vetëm për krevat, 70 mijë lekë të rinj në vit.
Qeveria nuk arriti dot bibliotekën online, u dhanë 800 mijë euro, sot nuk e kemi aktive. Nuk arriti dot që të bëjë kartën e studentit të vlefshme, se u bë për të shkuar te Kulla e Sahatit, për të blerë mish e gogozhare e për të vajtur në servise a thua se studentët kanë të gjithë nga një ‘Ferrari’ e s’kanë ku ta riparojnë”, tha ai.
Discussion about this post