Eksperti i arsimit Ndriçim Mehmeti, ka folur ditën e sotme rreth situatës së shkollave dhe mësimit që bëhet në vendin tonë. I ftuar në “Syri Tv”, eksperti e ka cilësuar vitin e ri mësimor si kaos, ku sipas tij gjithçka është lënë në duart e të paaftëve. Ndër të tjera, Mehmeti ngre si shqetësim mungesën e organizimit, ku sipas tij nuk ka asnjë program për vitin shkollor. Madje, ky vit “çalon”, kjo pasi mësuesit janë jo të trajtuar mirë, teksa shton se ata mungojnë për nxënësit me aftësi ndryshe.
“ Shkolla ka nisur me kaos. Ne e nisim vitin e ri pa asnjë program. Shkolla jonë është një kazermë, gjithçka është përqendruar në duar të paafta”, është shprehur Ndriçim Mehmeti.
Më tej, ai ka folur edhe për gjendjen e shkollave në rrethe, ku sipas tij ka edhe klasa në të cilat nuk ka nxënës për shkak të shpopullimit. Për sa i përket kryeqytetit, ka klasa me nga 38 nxënës, të cilëve nuk u bie kurrë radha të pyeten rreth mësimit.
Më pas ka vijuar me një sërë kritikash në lidhje me arsimin në Shqipëri, për të cilin fajin e kanë pikërisht drejtuesit.
