Fation Softa, ekspert i kriminalistikës, paralajmëroi se mund të ketë të tjera arrestime me urdhër të SPAK në rradhët e Policisë së Shtetit, në kuadër të zbërthimit të aplikacionit “Sky”.
Në një intervistë për ABCnews, Softa tha se operacioni i fundit i SPAK ka nisur prej vitesh, ndërsa shtoi se akuza për grup të strukturuar kriminal është e rëndë.
Softa tha se në proces verifikimi janë 56 punonjës të Policisë, të cilët janë në fazën e hetimeve.
“Analiza ime është që për aq koha sa kemi masa sigurie, që janë me arrest me burg, presim të kemi dhe arrestime të tjera. Mendohet se mund të ketë edhe 56 punonjës policie, të cilët kanë dalë në përgjime dhe mund të kemi arrestime. Nga eksperienca e deritanishme, në përgjithësi të gjitha këto kanë qenë me informacione dhe me fakte. Jemi në fazën e akuzave”, tha ai.
Softa u shpreh se “në rastin e Erzen Breçanit kemi dy momente: i pari ka të bëjë nëse arrestimi është kryer bazuar në faktet dhe provat që mund të ketë siguruar SPAK për akuzat që ka ngritur, pra si pjesë e një grupimi të strukturuar kriminal, por nuk duhet harruar se z.Breçani është i angazhuar direkt në sigurinë e ish-Kryeministrit Sali Berisha. Kjo përbën momentin e dytë, ndaj ne duhet të presim provat që SPAK do të çojë në Gjykatë, pasi nuk mund të shkojë atje me akuza”.
Duke bërë një paralelizëm mes operacionit të SPAK të disa muajve më parë që u pagëzua me emrin “Metamorfoza” dhe operacionit të nisur dje nga Prokuroria Speciale, Softa tha se në rastin e parë u konstatuan shumë material, shumë lidhje mes personazheve. “Sot duhet të presim se si lidhen këto personazhe, kush është koka e grupit, kush është financieri i grupit, si janë të lidhur personazhet me njëri-tjetrin”, tha Softa.
Discussion about this post