Ndërsa lufta në Ukrainë vazhdon prej më shumë se dy vitesh, një paralajmërim serioz vjen nga një eksperte e inteligjencës amerikane. Sipas saj, Vladimir Putin nuk ka ndërmend të ndalet, por po përgatitet për një tjetër pushtim.
Rebekah Koffler, eksperte e inteligjencës ushtarake amerikane, shkruan në The Telegraph se Rusia është duke u përgatitur për një tjetër ofensivë ushtarake në pak vite. Sipas saj, ndonëse është e vështirë që Rusia të sulmojë një vend të NATO-s (përveç nëse NATO fut trupa në Ukrainë), ekziston rreziku real që objektivi i radhës të jetë një shtet ish-sovjetik, si Moldavia.
“Çfarë do ose nuk do të bëjë NATO në vitet e ardhshme mund të jetë vendimtare nëse Putini vendos të sulmojë Moldavinë,” – shkruan Koffler.
Ndërkohë, presidenti amerikan Donald Trump deklaroi nga Skocia se është “shumë i zhgënjyer” nga Putini. Ai paralajmëroi sanksione të reja ndaj Rusisë nëse nuk ndërmerren hapa për paqe. Trump theksoi se i ka dhënë Putinit një afat prej 50 ditësh për negociata, por tashmë kanë mbetur vetëm “10 ose 12 ditë”.
“Menduam se e kishim zgjidhur disa herë, por pastaj Putini fillon të lëshojë raketa në qytete si Kievi dhe vret civilë, edhe në azile,” – u shpreh Trump, duke shtuar: “Kjo nuk është mënyra për të vepruar.”
Lufta në Ukrainë vijon e përgjakshme. Vetëm një ditë më parë, Rusia kreu sulme me dronë dhe raketa në rajonin verilindor të Sumyt, duke plagosur katër persona. Nga ana tjetër, Rusia pretendon se ka rrëzuar 50 dronë ukrainas, ndërsa në zonën e Shën Petersburgut u raportua një viktimë dhe tre të plagosur.
Discussion about this post