Gjykata Supreme e Mbretërisë së Bashkuar ka caktuar zyrtarisht datën 17 mars 2027 për të shqyrtuar apelin e paraqitur nga shteti shqiptar dhe Sekretarja britanike e Shtetit për Punët e Brendshme, Shabana Mahmood, lidhur me ekstradimin e pesë të dyshuarve për përfshirje në vrasjen e biznesmenit Ardian Nikulaj.
Në qendër të këtij shqyrtimi gjyqësor njëditor do të jenë shtetasit Edmond Haxhia, Thomas Mithan, Harriet Bridgeman, Harry Simpson dhe Steven Hunt, të cilët kërkohen nga Prokuroria e Lezhës si bashkëpunëtorë në planifikimin dhe ekzekutimin e biznesmenit në Shqipëri. Nikulaj u vra nga shtetasi Ruben Saraiva, i cili tashmë është shpallur fajtor dhe është dënuar me burgim të përjetshëm.
Vendimi i Supreme Court vjen pasi Gjykata e Lartë britanike (High Court) më parë kishte shfuqizuar urdhrat e ekstradimit për shkak të procedurave ligjore. Konkretisht, kërkesat fillestare të certifikuara nga Britania i referoheshin veprave penale të “Vrasjes për shkak të gjakmarrjes” (Neni 78/a) dhe “Armëmbajtjes pa leje” (Neni 278/1), ndërsa në përfundim të procesit u kërkua ekstradimi për “Vrasje me paramendim” (Neni 78). Gjykata e lartë angleze do të përcaktojë nëse Sekretari i Shtetit duhet të identifikojë saktësisht veprën penale specifike gjatë lëshimit të urdhrit të ekstradimit sipas nenit 93 të Ligjit për Ekstradimin të vitit 2003.
gijotina.com/
Discussion about this post