Autoritetet shqiptare kanë nisur procesin për ekstradimin e Laert Haxhiut, 31 vjeçarin, e arrestuar në Greqi, i cili akuzohet për atë që njihet si masakra e Lushnjes, ndodhur pak vite më parë.
Autoritetet shqiptare kanë 40 ditë kohë për të përgatitur dosjen dhe për ti kërkuar autoriteteve greke që të lejojnë ekstradimin e Haxhiut, i cili ndodhet në një nga burgjet greke, pas arrestimit në Janinë nga policia.
Nga raportimet mësohet se SPAK i ka përcjellë dosjen Ministrisë së Drejtësisë, e cila do të vijojë procedurat duke përkthyer dosjen, e cila do ti përcillet më pas autoriteteve greke.
Dy ditë më parë gjykata e Janinës e la në burg 31-vjeçarin me afat 40-ditor me qëllim ekstradimin drejt Shqipërisë. Gjatë kësaj periudhe ndaj tij do zhvillohet edhe një seancë tjetër gjatë të cilës do të shqyrtohen aktet e mbërritura nga Shqipëria e më pas do vendosin nëse do të pranohet apo jo kërkesa për ekstradimin.
Vetë Laert Haxhiu ka mohuar se ka marrë pjesë në masakrën e Lushnjës për të cilën akuzohet. Ai kërkon nga autoritetet greke të mos pranojnë ekstradimin pasi në Shqipëri i rrezikohet jeta dhe për më tepër disa nga anëtarët e familjes së tij kanë përfituar azil.
18 vite heqje lirie e ka dënuar Gjykata e Lushnjës për plagosjen e Sajmo Xhelilit dhe Xhulio Shkurtit në 25 shtator të 2016-ës.
Ndërsa nga SPAK është shpallur në kërkim ndërkombëtar për atë që njihet si “masakra e Lushnjës”. Haxhiu, së bashku me Orges Bilbilin dhe Anterio Kaloshin, tentuan për të dytën herë që të ekzekutonin nipin e Aldo Bares, ngjarje në të cilën vdiqën Jurgen Hoxha dhe Zamir Latifi.
Discussion about this post