Siguria në vend vijon të jetë e cënuar, ndërsa policia nuk ka mundur dot të zbardhë ngjarjet kriminale në qytete të ndryshme të Shqipërisë.
Viti 2021 ka një bilanc negativ ku kriminaliteti rritet me shifra të frikshme, ndërsa puna e policisë mbetet thuajse inekzistente. Prej janarit e deri tashmë në javën e parë të nëntorit, plot 21 atentate mafioze kanë terrorizuar vendin duke shënuar dhe 22 viktima. Policia e shtetit dhe autoritetet e tjera kanë zbardhur vetëm 6 prej këtyre ngjarjeve, ku pjesa më e madhe janë atentate mafioze.
Qytetet me kriminalitetin më të lartë në vend mbeten Vlora, Elbasani, Shkodra, Fieri dhe Laçi. Ngjarjet në këto qytete kanë qenë të shumta, ku duket se policia është e pafuqishme në kapjen e autorëve.
Atentati i fundit është ai në Laç ndaj Xhelal Reçit, një ish-efektiv policie i cili u vra në qendër të qytetit. Detajet e vetme rreth kësaj ngjarje janë makina e djegur e autorëve dhe historiku i viktimës.
Kjo ngjarje do të jetë gjithashtu shumë e vështirë për grupin hetimor, për të bërë zbardhjen e plotë të saj.
Skemat e ndjekura në çdo ngjarje janë të njëjta. Atentatorët pas ekzekutimit të shënjestrës, largohen me një automjet të cilin më pas e braktisin dhe e djegin për të humbur gjurmët. Prej atij momenti çështja qëndron në sirtar e pas disa kohësh harrohet.
Burimet bëjnë me dije se 2 ngjarje janë drejt zbardhjes. Sipas informacioneve bëhet fjalë për atentate në Vlorë e Elbasan. Kujtojmë këtu që në qytetin bregdetar janë vrarë emra të njohur të krimit, përplasje mes bandash e sërish autorët mbeten enigmë.
