Afro 24 orë pas vrasjes së Bujar Nasufit, Policia e Tiranës ka gjetur motorin që dyshohet se u përdor nga autori. Me qëllim zhdukjen e gjurmëve vrasësi dyshohet se e ka djegur atë në Kodrat e Sharrës në kryeqytet.
Motori u gjend gjatë krehjes së zonës nga shërbimet e policisë, të cilat janë duke punuar për identifikimin dhe kapjen e autorit dhe bashkëpuntorëve të mundshëm. Hetimet e autoriteteve janë përqendruar në konfliktet e pronësisë që 56-vjeçari kishte me anëtarët e tjerë të familjes së tij.
Bujar Nasufi u ekzekutua me armë zjarri rreth orës 20:40 pranë Pallatit me Shigjeta në Tiranë. Pamjet e kamerave të sigurisë, të sekuestruara nga policia, tregojnë se vrasësi mbante në kokë një kapuç dhe ishte kamufluar si një shpërndarës picash. Autori ishte duke e pritur 56-vjeçarin pranë banesës së tij dhe e ka qëlluar me armë zjarri sapo bashkëshortja zbriti nga makina.
Pas krimit, autori është larguar me motor drejt Selitës. Nga verifikimet e policisë rezulton se 56-vjeçari Bujar Nasufi nuk ishte person me të shkuar kriminale.
Discussion about this post