Ekzekutimi i Arben Mërkurit në Sukth, 12 të shoqëruar. Pistat kryesore të policisë

Të paktën 12 persona janë shoqëruar në polici për vrasjen e Arben Mërkurit i njohur ndryshe si “Maneci” gjatë mbrëmjes së djeshme në Sukth.

Arbën Mërkuri alias Ismaili, 48 vjeç u ekzekutua me breshëri automatiku në dyqanin e tij në Sukth. Një makinë luksoze ku udhëtonin dy persona ka ndaluar para dyqanit të viktimës ku njëri prej tyre ka zbritur në asfalt dhe ka qëlluar me breshëri. Më pas makina është larguar me shpejtësi. Mësohet se autorët kanë qenë të maskuar.

Viktima ishte një emër i njohur për policinë. 48-vjeçari dyshohej si person i përfshirë në krime kundër personit, për vrasje ne pagesë, por nuk ka asgjë të dokumentuar. Ende nuk dihet nëse krimi lidhet me larjes hesapesh.

“Maneci” ishte arrestuar edhe për dhunimin e biznesmenit libanez Fadi Mitri. Biznesmeni, Fadi Mitri, ka qenë i shoqëruar nga bashkëshortja dhe fëmija në momentin kur u sulmua barbarisht me shkop bejsbolli. Ai është goditur 10 herë në kokë dhe 7 herë të tjera në gjymtyrë e për pasojë pësoi hematoma të shumta.

Makina luksoze e autorëve është larguar menjëherë nga vendi i ngjarjes teksa forca të shumta policie janë vënë në kërkim. Po kështu janë sekuestruar pamjet e kamerave të sigurisë të objekteve pranë vendit të ngjarjes, ndërkohë që janë marrë në pyetje të afërm dhe persona të pranishëm që mund të kenë dijeni për autorët apo arsyet e krimit.