Gjendet arma e krimit e përdorur në vrasjen e 28-vjeçarit Klajdi Prendit, djalit të ish-gjyqtarit Fran Prendi.
Ngjarja e rëndë ndodhi një ditë më parë në Tiranë.
Ekspertët e krimeve, pas një kontrolli të dytë që kanë kryer në makinën e djegur tip Audi A4, kanë gjetur një pistoletë me silenciator, e cila ishte plotësisht e djegur.
Ngjarja ndodhi pak pas mesnate, rreth orës 00:36 të 19 nëntorit. Autorët, të cilët dyshohet se ishin 3, shoferi, qitësi dhe një person që i ka ndihmuar për t’u larguar, e kanë vëzhguar djalin e ish-gjyqtarit. Ata e kanë pritur të riun, që ishte në lokal me miqtë, derisa doli dhe në momentin që po hipte në makinën e tij e kanë qëlluar me silenciator.
Policia po heton mbi disa pista, përfshi edhe ato që lidhen me profesionin e të atit, ish-gjyqtarit Fran Prendi, i cili deri në vitin 2020 ka qenë pjesë e sistemit të drejtësisë dhe ka gjykuar çështje të rëndësishme të krimit të organizuar.
Sipas burimeve, viktima kohët e fundit kishte pasur edhe konflikte me persona të tjerë, për çështje borxhi. Madje, ditët e fundit Prendi ishte konfliktuar edhe fizikisht me disa persona për shkak se nuk kishte kthyer një borxh prej 15 mijë eurosh.
Babai i viktimës, ish-gjyqtari Fran Prendi, në dëshminë e tij ka thënë që ishte në dijeni që djali i tij kishte konflikte me të tjerë, por jo aq të rënda sa për të përfunduar në një atentat. Makina luksoze që përdorte viktima nuk ishte në emër të tij, por të një vajze.
Discussion about this post