E njëjta skemë e fshirjes së gjurmëve është përdorur edhe në ekzekutimin e dyfishtë që tronditi mbrëmjen e djeshme Tiranën. Për vrasjen në Astir të të rinjve me të shkuar kriminale, Erigers Mihasi dhe Armando Dumani dyshohet se janë përdorur dy armë zjarri kallashnikov, të cilat janë gjetur në mjetin tip “Toyota” me targa AA 532 ON që u dogj në Thumanë.
Viktimat të cilët u ekzekutuan mbrëmë, janë kontrolluar nga efektivët e policisë vetëm 30 minuta para se të ekzekutoheshin në zonën e “Politeknikut”. Dumani po drejtonte mjetin e llojit “Audi” brenda të cilit u vra në momentin që një efektiv i Policisë Rrugore e ndaloi dhe i kontrolloi dokumentacionin e nevojshëm.
Gjatë natës ka pasur kontrolle në disa qytete të vendit, por deri më tani nuk ka asnjë konfirmim zyrtar për të dyshuar lidhur me ngjarjen. Pikat e kontrollit janë ngritur në Tiranë, Durrës dhe në Elbasan. Ndërkohë që Policia gjithashtu ka sekuestruar filmimet e kamerave të sigurisë, të cilat mendohet se kanë kapur atentatin dhe mendohet se do të ndihmojnë hetuesit në identifikimin dhe kapjen e autorëve.
Discussion about this post