Ekzekutimi i dyfishtë në Astir, detajet që ngrenë dyshime për vrasës me pagesë

Në sagën e vrasjeve të shënuara muajt e fundit në vend, është shtuar edhe rasti i Erigers Mihasit dhe Armando Dumanit mbrëmjen e djeshme në Astir.

30 minuta para atentatit dy të rinjtë autorë të disa veprimtarive kriminale në vend, janë ndaluar nga policia për kontrolle te ”Politekniku” teksa ishin duke udhëtuar me mjetin luksoz “Audi”.

Dyshohet se autorët kanë ndjekur çdo lëvizje të “të shënjestruarve”, deri në ekzekutimin final të tyre.

Por cilat janë detajet që ngrenë dyshimet për atentat të mirëorganizuar mafioz me vrasës me pagesë?

Në vorbullën e hetimeve është përforcuar dyshimi se kemi të bëjmë me një atentat të mirëorganizuar mafioz. Hetimet e deritanishme të vrasjes, na sjellin më afër këtij dyshimi, mes të cilave rendisim 3 faktorë më kryesorë, që atentatorët i kanë përfshirë në prapaskenat për ekzekutimin e dy të rinjve.

Ngjarja ka ndodhur në mbrëmjen e djeshme rreth orës 19:30, autorët të cilët dyshohet të kenë qenë më shumë se një kanë ndjekur çdo lëvizje të viktimave dhe kanë qëlluar me breshëri plumbash në zonën e kryqëzimit në Astir. Në momentin e ekzekutimit, burime për gijotina.com bëjnë me dije se në vendin e ngjarjes ka patur shumë pak këmbësor, ndaj edhe atentatorët kanë hapur zjarr drejt mjetit tip “Audi” me të cilën po udhëtonin dy të rinjtë.

Nuk përjashtohet mundësia se në atentat të jenë përfshirë edhe persona të tjerë në rolin e informatorëve, përveç atyre që kanë bashkëpunuar për t’i larguar nga vendi i ngjarjes, djegur mjetin në Thumanë dhe arratisur në drejtim të paditur.

Atentatorët numri i të cilëve nuk dihet ende, jo më kot zgjodhën mbrëmjen për të kryer misionin për vrasjen e tyre pasi errësira do të favorizonte në arratisjen e tyre.

Një nga manovrat që atentatorët kanë zgjedhur për të fshehur gjithashtu gjurmët e krimit është edhe djegia e automjetit me të cilën kryen vrasjen dhe armët tip kallashnikov që i kishin vënë flakën bashkë me mjetin.

Skemë kjo e përdorur në ekzekutimet mafioze të ndodhura ndër vite në vend, shumica prej të cilave kanë mbetur pa autorë. A.L /gijotina.com