Rreth 8 persona janë shoqëruar nga policia lidhur me atentatin me dy të vrarë që tronditi vendin ditën e sotme në Vlorë.
Deri tani kemi në tryezën e hetimeve pistat emrat e viktimave dhe të shkuarën kriminale të tyre. Hetimet e kryera deri më tani ngrenë dyshime se kemi të bëjmë me një atentat të mirëorganizuar dhe të porositur.
Autorët ekzekutuan Geno (Shpat) Lenën dhe Hakim Xhezo teksa këta të fundit sot nuk kanë qarkulluar me mjetin e tyre të blinduar por me një mjet tip “Benz” gri.
Ngjarja ka ndodhur në aksin Fier-Vlorë në afërsi të fshatit Panaja, mëngjesin e sotëm rreth orës 10:00. Autorët të cilët dyshohet se kanë qenë tre kanë qëlluar me 3 automatikë duke mos u lënë mundësinë shënjestrave të shpëtonin.
Sipas hetimeve dhe burimeve për gijotina.com bëhet me dije se autorët kanë ndjekur çdo lëvizje të viktimave dhe në momentin e ekzekutimit kanë shkuar paralel me mjetin “Benz” të viktimave dhe kanë hapur zjarr, më pas janë larguar nga vendi i ngjarjes.
Plumbat bënë që mjeti ku ishin Xhezo e Lena të humbte kontrollin e të përfundonte në kanal, duke mos u lënë asnjë mundësi shpëtimi.
Makina nga e cila ata qëlluan në drejtim të viktimave u gjet më pas e djegur në fshatin Frakull ndërsa brenda saj ishin edhe 3 automatikë.
Pistat e hetimit/ Hasmëria
Mësohet se Lena është një emër i njohur për drejtësinë pasi ka qenë njëri prej autorëve të dyshuar për vrasjen e biznesmenit Arben Beqiri në vitin 2019 për të cilën u la në burg Eduard Xhezo i cili është vëllai i Hakim Xhezos që u ekzekutua ditën e sotme.
Lena është arrestuar në mars të këtij viti pasi ishte shpallur në kërkim prej vitit 2019. Ndërsa ndaj tij u mor vendimi për detyrim paraqitje sa i takon përfshirjes në vrasjen e biznesmenit Arben Beqirit.
37 vjeçari Lena i cili njihet si një prej “të fortëve” të Vlorës, u përfshi në konfliktin që ndodhi pas rrahjes së Gazment Alushit në nëntor të vitit 2019, sherr që më pas solli edhe vdekjen e Arben Beqirit.
Pista e dytë është ajo e pazareve të drogës
Hakim dhe Eduari Xhezo, i arrestuar për vrasjen e Arben Beqirajt kanë qenë subjekte të Operacionit Forca e Lligjit. OFL më Korrik 2020 u nisi kërkesat me shkrim për vetëdeklarimin e burimeve të pasurisë, dy vëllezërve Eduart dhe Hakim Xhezo. Sipas OFL, ndaj Eduart Xhezo, Gjykata e Rrethit Gjyqësor Vlorë ka vendosur masën e sigurisë “Arrest në burg”, për vrasjen e biznesmenit Arben Beqiraj në Vlorë. Ndërsa Hakim Xhezo, rezulton i dënuar nga Gjykata e Rrethit Gjyqësor Vlorë, për veprën penale “Prodhimi dhe shitja e narkotikëve”. Për këtë arsye nuk përjashtohet edhe kjo pistë hetimi.
Discussion about this post