Policia e Elbasanit ka shoqëruar 25 persona gjatë natës, pas atentatit që iu bë Everest Çakës në sy të bashkëshortes së tij. Dëshmia e kësaj të fundit e cila ndodhet në spital pasi u plagos, si dhe dëshmia e një kalimtari të rastit, pritet të çojnë në zbardhjen e plotë të zanafillës së vrasjes së 41-vjeçarit.
25 personat të cilët policia ka shoqëruar në komisariat, mësohet se do japin dëshminë e tyre rreth atentatit nga ku gjeti vdekjen Caka. Nga dëshmia e tyre pritet të dalin edhe detaje të tjera nga organizimi i vrasjes, që deri më tani dyshohet se është kryer nga vrasës me pagesë.
Eleminimi i viktimës është bërë në mënyrë profesioniste, të paktën kjo është ajo që hetuesit kanë mundur të nxjerrin në dritë deri më tani. Pengesë në hetime është mungesa e filmimit qartë të kamerave të sigurisë, pasi në zonën ku ndodhi ekzekutimi, ndriçimi ishte i ulët. Dy dëshmitë kryesore që do nxjerrin në dritë hetimet janë, ajo e bashkëshortes së viktimës, Silvana Çeka, që mbeti e plagosur si edhe një banor i lagjes “Skënderbej” që ndodhej rastësisht aty pranë në makinën e tij duke pritur për të shoqëruar të ëmën e tij për ta shoqëruar në banesë. Viktima Everest Çaka është qëlluar për vdekje brenda makinës së tij, duke ndërruar jetë në vend, teksa shkonte për tek prindërit e bashkëshortes. Ngjarja ka ndodhur mbrëmjen e djeshme, rreth orës 20:00, në lagjen “Skënderbej.
