Dy janë pistat që autoritetet italiane po hetojnë lidhur me vrasjen e shqiptarit Klaudio Myrtaj, i cili u ekzekutua me një plumb në kokë pasditen e së shtunës, teksa ndodhej në një punishte të vogël zdrukthtarie në qendrën historike të Vernentes.
Mediat italiane shkruajnë se hetimet janë përqëndruar në dy pista: njëra e lidhur me krimin e organizuar të vogël vendas, tjetra me një motiv të mundshëm pasioni.
Hetuesit po shqyrtojnë gjithashtu imazhet nga kamerat e vëzhgimit në zonë, me shpresën se njëra prej tyre filmoi vrasësin përpara se të mbërrinte në dyqanin e zdrukthëtarisë ose pas arratisjes së tij.
Mediat raportojnë se pamjet e mbledhura nga kamerat po analizohen dhe besohet se hetuesit do të bien në gjurmët e vrasësit, që dyshohet se ka përdorur një silenciator, përsa kohë nga dëshmitë e mbledhura në zonë, nuk është dëgjuar krismë arme.
34-vjeçari Myrtaj u gjet në një pellg gjaku, pothuajse i pajetë, pasditen e së shtunës, në një zonë shumë pranë bashkisë.
Myrtaj ishte shpërngulur në luginën e Vermenagnas disa muaj më pare. Ai herë pas here bashkëpunonte me një zejtar në fshat në punishten e tij të zdrukthëtarisë, ku u gjet pasditen e së shtunës.
Në kokën e Myrtajt u evidentua një plagë e shkaktuar nga një armë zjarri.
Vrasësi kishte vepruar ndërkohë që 34- vjeçari ishte i vetëm në punishten e zdrukthtarisë.
Siç konfirmohet edhe nga TorinoToday, karabinierët janë në kërkim të personit përgjegjës dhe po përpiqen të kuptojnë motivin e krimit.
Sipas mediave italiane, lidhur me ngjarjen janë marrë në pyetje pronari i zdrukthtarisë, një klient që dha alarmin, dhe e dashura e burrit.
Discussion about this post