Gjykata e Posaçme e Shkallës së parë në vendimin e kësaj të mërkure ka vendosur rikthimin për gjykim të çështjes për të pandehurin Ilir Selmani, i akuzuar për vrasjen e Santiago Malkos.
Burime për gijotina.com bëjnë me dije se se në vendimin e sotëm gjykata ka vendosur që të dërgojë për gjykim edhe Elvis Gaxhaj për armëmbajtje pa leje dhe shitje narkotikësh.
Ndërsa sot është vendosur që të pushohen hetimet për Xhoni Nicën i hetuar gjithashtu për të njëjtën ngjarje.
Dinamika e ngjarjes
Ekzekutimi i ish-policit Santiago Malko në 27 gusht 2019 në zonën e “Xhamllikut” është kryer nën mbikqyrje të plotë të autorëve të krimit. Ai sapo kishte dalë me makinën e tij tip BMW nga një lavash në krahun tjetër të rrugës. Pikërisht në këtë moment autorët kanë nisur “aksionin” për vrasjen e Malkos. Sipas hetuesve që kanë bërë këqyrjen e kamerave të sigurisë, mësohet se autorët kanë qenë të maskuar me kapuç të zi dhe kanë vepruar me dy makina. Fillimisht ka qenë një nga makinat e autorëve që i ka bllokuar rrugën, ndërsa grupi tjetër që ishte pas me një fugon, kanë qëlluar me breshëri kallashnikovi në drejtim të Santiago Malkos, duke e lënë të vdekur në vend. Makina e Malkos, ndoshta nga një tentativë për të shpëtuar, është përplasur me një shtyllë elektrike dhe më pas me disa kazanë mbeturinash, ka vijuar ecjen deri sa ka përfunduar në ambientet e një biznesi privat. Pasi kanë kryer ekzekutimin, autorët janë larguar me shpejtësi, ndërsa pak minuta më vonë është gjetur në periferi të Tiranës një automjet tip “Benz”, i dyshuar si i autorëve, me dy kallashnikovë brenda. Ndërsa fugoni nga ku është qëlluar Malko nuk është gjetur ende. Viktima mësohet se nuk kishte armë me vete, por vetëm celularin, i cili është sekuestruar.
