Të tjera detaje kanë dalë lidhur me vrasjen e të riut Xhuljano Bullari në Vlorë. Sipas burimeve familjarët e Bullarit kanë mësuar për vdekjen e të birit përmes kushërirës. Kjo e fundit ishte pronarja e mjetit në të cilin u gjet i pajetë 25-vjeçari në fshatin Babicë të Vlorës. Automjeti i llojit “Fiat Punto” është në pronësi të kushërirës së tij.
Në momentin e verifikimit të targave të automjetit nga ana e Policisë që shkoi në vendin e ngjarjes, pasi u lajmërua nga kalimtarë të rastit, rezultoi se i përkiste një vajze banuese në Tiranë.
Policia ka kontaktuar fillimisht me atë që rezultoi të ishte kushërira e viktimës, duke i dhënë kështu lajmin e krimit të rëndë. Ka qenë ajo që ka njoftuar familjarët, të cilët kanë shkuar në Vlorë. Ka qenë e ëma që ka identifikuar djalin e saj në morgun e spitalit të qytetit, ndërsa babai e mësoi lajmin nëpërmjet mediave pikërisht pranë Drejtorisë së Policisë së Vlorës.
