Ekzekutimi në Rrëshen, gjendet i djegur automjeti i autorëve. Dyshimet mbi vrasësit

Një ngjarje e rëndë ka tronditur Rrëshenin mëngjesin e sotëm, pasi një person është vrarë me armë zjarri në qendër të qytetit.

Martin Bardhi u ekzekutua me breshëri kallashnikovi, ndërsa mësohet se atentatorët kanë hapur zjarr edhe pse në afërsi të viktimës ka pasur shumë njerëz. Raportohet se si pasojë e të shtënave janë plagosur edhe 3 qytetarë.

Dyshohet se autori ose autorët e vrasjes janë vrasës profesionistë, ndërsa u raportua se këta të fundit janë larguar nga vendngjarja me një automjet fuoristradë, tip “Jeep”.

Nga raportimet mësohet se pasi kanë qëlluar me breshëri ndaj Martin Bardhit, në largim e sipër nga mjeti i autorëve është qëlluar sërisht me armë zjarri në ajër.

Ndërkohë raportohet se pak minuta pas ngjarjes në fshatin Gëziq, Mirditë, është konstatuar duke u djegur një automjet tip fuoristradë, që dyshohet se është përdorur nga autorët, për kryerjen e vrasjes.

Rrëshen/Informacion shtesë

Në vijim të informacionit të dhënë në lidhje me ngjarjen e ndodhur në Rrëshen, ku nga shtetas ende të paidentifikuar, u vra me armë zjarri shtetasi M. M. (B.)., ju informojmë se si pasojë e të shtënave, kanë mbetur të plagosur me armë zjarri, shtetasit I. B., I. B. dhe O. Gj., të cilët kanë qenë në afërsi të vendit ku ka ndodhur ngjarja dhe janë transportuar në spital, për të marrë ndihmën mjekësore.

Ndërkohë, në fshatin Gëziq, Mirditë, është konstatuar duke u djegur një automjet tip fuoristradë, që dyshohet se është përdorur nga autorët, për kryerjen e vrasjes.

Forca të shumta policie kanë rrethuar zonën dhe në ndihmë të Policisë lokale, janë nisur Forcat Speciale “RENEA” dhe FNSH, si dhe në Rrugën e Kombit, në drejtim të Kukësit, të Laçit, Lezhës dhe Dibrës, janë ngritur pika kontrolli.

Gjithashtu, drejt vendit të ngjarjes janë nisur Zv/drejtori i Përgjithshëm i Policisë së Shtetit dhe drejtorët e departamenteve të Policisë Kriminale, si dhe të Rendit dhe Sigurisë Publike.

Për zbardhjen e kësaj ngjarjeje është ngritur një grup i posaçëm hetimor, me specialistë nga Departamenti i Policisë Kriminale në DPPSH dhe nga Policia vendore, dhe në drejtimin e prokurorit, vijon puna intensive për identifikimin dhe kapjen e autorëve.