Tre ditë pasi vrau me gjakftohtësi katër pjesëtarët e një familje shqiptare në Greqi, ka rënë në pranga autori i dyshuar. Sipas autoriteteve greke, ka qenë një patrullë e saj që e identifikoi fillimisht dhe iu vu në ndjekje në zonën e Pirgosit.
Personi në fjalë, identiteti i të cili nuk është bërë i ditur, u ndoq në distancë për rreth 120 km dhe në momentin që automjeti i tij iu afrua qytetit të Patras, dhjetëra forca policie që po e prisnin mundën ta ndalonin. Policia helene arriti të bënte ndalimin e tij, pasi sipas autoriteteve greke, 60-vjeçari paraqiste rrezik të lartë pasi qarkullonte i armatosur.
Sipas mediave të huaja, mësohet se ai pasur mosmarrëveshje financiare me çiftin për qiranë, pasi ishte pronar i shtëpisë. Banorë të zonës kanë treguar se ai u kishte thënë se do t’i dëbonte nga shtëpia para skadimit të kontratës që vlente deri në mars. Gjithashtu, ndërprerja e energjisë në këtë shtëpi tregon se si kjo mund të ketë qenë një mënyrë për t’i përzënë ata nga shtëpia një orë më parë.
Ngjarja e rëndë ndodhi para tre ditësh ku i arrestuari vrau çiftin e prindërve dhe dy fëmijët 2 dhe 4 vjeç, ndërsa ka qenë fëmija tjetër i familjes, 12 vjeç që gjeti trupat e viktimave dhe që aktualisht ndodhet në gjendje të rëndë psikologjike. Autori u dërgua në drejtorinë e policisë të Ahaias dhe pritet të merret në pyetje.
Discussion about this post