Ka ndërruar jetë në spitalin e Traumës 21-vjeçari Aldi Hoxha, autori i vrasjes së efektivit të Lezhës, Saimir Hoxhës. I riu ishte i shtruar që nga pasditja e djeshme në spitalin e Traumës pasi u gjet nga forcat e policisë me plagë në kokë, duke qenë se tentoi vetëvrasjen. Menjëherë pas lokalizimit dhe gjetjes së tij, 21-vjeçari u nis drejt spitalit të Traumës në Tiranë, ku qëndroi në intubim, por si pasojë e plagëve te marra nuk mundi të mbijetonte.
Mjekët nuk mundën të ndërhynë për t’i shpëtuar jetën pasi parametrat e tij jetike ishin shumë të ulëta. Për shkak të plumbit që ka marrë në kokë, pjesa më e madhe e trurit i kishte dalë jashtë funksionit.
Ngjarja e rëndë ndodhi paraditen e djeshme në Lezhë, ku oficeri bashke me shefin e krimeve Leonard Palushi dhe specialistin e zones Petrit Doda, u nisën për në drejtim të kënetës Kune Vain pasi drejtoria e policisë së shtetit i kishte njoftuar për një parcelë me kanabis. Ata zbuluan parcelën me 110 rrënjë hashash duke e asgjësuar me djegie. 9 bimë i vendosën ne bagazhin e makinës për ti çuar për ekspertizë dhe u nisën në rrugën e kthimit. Në zonën e mbrojtur të quajtur Kune-Vain në Lezhë efektivë u ndeshën me mjetin “Volksvagen”, brenda të cilit ndodheshin tre të rinj.
Një manovër e kryer nga drejtuesi i mjetit, Armando Marku me profesion mësues, bëri që policët të ndalonin të rinjtë dhe të kërkonin kontrollin e tyre. Marku u bind, zbriti dhe dorëzoi dokumentacionin e nevojshëm, të njëjtën gjë bëri edhe shoku tjetër, pasagjer në vendin e parë, Kristjan Shehri, kurse Aldi Rama, pasagjer në sediljen e pasme, kundërshtoi.
I riu ka nxjerrë armën dhe ka qëlluar drejt Saimir Hoxhës duke e lënë të vdekur, ndërsa më pas ka marrë makinën dhe është larguar duke hedhur në kanal dy policët e tjerë. Ndonëse policët kanë qëlluar me armë drejt tij, ai nuk ka ndaluar. Palushi dhe kolegu u kthyen pranë Hoxhës, të cilin e dërguan në spitalin e Lezhës, por 44-vjeçari nuk arriti të mbijetonte dhe ndërroi jetë.
Pas krimit, Rama u arratis drejt zonës së mbrojtur Kune Vain në Lezhë, ku u lokalizua përmes celularit të tij. Ai u rrethua nga forcat RENEA dhe pas pesë orësh u gjet i shtrirë buzë një kanali me një plumb në kokë. Pranë iu gjet armë me të cilën kishte vrarë oficerin Hoxha dhe kishte qëlluar veten në kokë, duke tentuar vetëvrasjen.
Autori i kësaj ngjarje nuk është person i panjohur për drejtësinë, pasi ishte arrestuar më parë për shpërndarje droge, që në moshën 17 vjeçare dhe së fundi ishte në arrest shtëpie nën akuzën “Prodhim dhe mbajtje e lëndëve narkotike”.
Saimir Hoxha me origjinë nga Puka dhe banues në Tiranë, la pas dy fëmijë të mitur. Ministri i Brendshëm Bledi Çuçi bëri me dije ditën e djeshme se kanë nisur procedurat e se Hoxha do të shpallet ‘Dëshmor i Atdheut.
