Katër kallashnikovë u gjetën të groposur në një lulishte, në qendër të qytetit të Elbasanit. Nuk dihet që kur ato janë vendosur aty, por armët ishin ndryshkur. Sipas policisë, një punëtor i firmës që po kryen punimet tek parku “Rinia” në qendër të Elbasanit kishte telefonuar në sallën operative të policisë. Kallashnikovët ishin futur në thasë dhe bashkë me to u gjetën edhe katër krehër me hark metalik model 56. Policia po punon për zbardhjen e ngjarjes, identifikimin dhe kapjen e autorit.
