Një situatë tepër shqetësuese paraqitet për banorët e lagjes Emin Matraxhiu në Elbasan, aty ku jo vetëm mbeturinat por edhe kanalizimet e hapura të ujërave të zeza e bëjnë tepër të vështirë jetesën.
Banorët kanë një jetë që bashkëjetojnë me ujërat e zeza dhe ndotjen dhe ndihen të pashpresë që dikush do vërë dorë për të zgjidhur këtë problematikë, pasi sipas tyre politikanët vijnë vetëm për zgjedhje.
Lagjja mbizotërohet nga banorë të moshuar dhe ata të komunitetit rom, gjë e cila bën që kërkesa e llogarisë ndaj autoriteteve të jetë shumë e vogël.
“Kanalizimi i ujërave të zeza është shqetësim i madh. Na shqetësojnë shumë ujërat e zeza. Ça të bëjmë“, -thotë banori, i cili jeton prej vitesh në këtë lagje.
“Njerëzit vijnë e shajnë e pështyjnë. Thonë e dimë vetë ku i hedhim mbeturinat. Edhe ujërat e zeza janë problem. Aty ke ne nuk i hedhin as në përrua. Vjen era sa nuk mund kalosh. Ça të bëjmë, ku të shkojmë. Fëmijët u sëmurën. Ku t’i çoj? Gocën e pata sëmurë nga era. Kur bie shi del uji rrugës, vjen te dera e shtëpisë. Nuk kemi çfarë bëjmë. Gjithë ditën rrinë ke plenat, ku të shkojë çuni. Me ato erna. I kërkojmë bashkisë ndërtim rruge. Ata nuk vijnë” – shprehet banori në këtë lagje.
Gjithashtu, një tjetër banor shprehet se: “Ka shumë kohë kjo situatë, që në ’90, dhe nuk ka për t’u zgjidhur kurrë. Era është shumë e rëndë, ka shumë mushkonja dhe miza. Është shumë shqetësuese për banorët. Janë bërë kërkesa. E mira është që të rregullohet siç është bërë krahu matanë. Pse nuk paska mundësi bashkia të vërë dorë këtu?! Nuk jap dot shpjegim pse nuk merren masa.”
Nga ana tjetër, banorët thonë se pushteti qendror dhe ai vendor shfaqen vetëm në fushatën elektorale, ndërsa në ditë normale këto banorë ‘harrohen’ mes halleve dhe problematikave të shumta që kanë.
