Elbasani shkon në këtë sfidë me disa rikuperime të rëndësishme, që mund të ndryshojnë shumë ekuilibrat në fushë. Kapiteni Bruno Lulaj do të rikthehet pas mungesës ndaj Dinamos, ku ishte pezulluar për shkak të kartonit të kuq të marrë në përballjen me Egnatian.
Prezenca e tij pritet të jetë një shtysë e madhe për verdheblutë, duke dhënë stabilitet në mesfushë dhe përvojë në momente vendimtare të lojës. Po ashtu, lajme pozitive vijnë edhe nga infermieria e klubit. Sulmuesi Ze Gomesh dhe mbrojtësi Sigitas Olberkis kanë stërvitur me ritëm të kënaqshëm gjatë ditëve të fundit, duke treguar se rikuperimi i tyre po shkon sipas planit.
Pjesëmarrja e tyre do të vlerësohet me kujdes në ditët e ardhshme, por përgatitjet e fundit tregojnë se mund të jenë të gatshëm për sfidën e rëndësishme kundër Partizanit, duke ofruar opsione më të shumta për trajnerin Ivan Gvozdenoviç.
Ndërkohë, rikuperimi i sulmuesit izraelit Roei Ben Shimon do të kërkojë ende durim. Ai vazhdon të vuajë nga dëmtimi në kavilje dhe nuk pritet të jetë gati për ndeshjet e ardhshme për disa javë, duke i detyruar trajnerin të mendojë alternativa për sulmin e skuadrës.
Megjithatë, atmosfera te ekipi është pozitive, rikthimet e Lulajt, Gomeshit dhe Olberkis sjellin motivim dhe besim te skuadra, duke treguar se Elbasani është i përgatitur jo vetëm për të kërkuar fitoren në këtë ndeshje, por edhe për të ruajtur kryesimin dhe për të treguar se ka ambicie serioze për objektivat e sezonit./ Panorama Sport
Discussion about this post