Elbasani vijon përgatitjet intensive në vigjilje të sezonit të ri nën drejtimin e dy teknikëve Anxhelo Suta dhe Hetlen Çapja. Objektivi primar për edicionin e ri është ngjitja një kategori më lart.
Për këtë arsye verdheblutë po bëjnë përpjekje për të afruar lojtarë cilësorë që t’u mundësojnë realizimin e objektivit. Trajerni Suta zbulon se klubi është në bisedime me lojtarë që më herët kanë luajtur në elitën e futbollit shqiptar.
“E rëndësishme është që nisëm përgatitjet këto ditë dhe pak e nga pak do të arrijmë të krijojmë grupin që duam. Jemi në bisedime kryesisht me lojtarë që më herët kanë luajtur edhe në Superiore, kjo për t’i dhënë më shumë eksperiencë dhe cilësi skuadrës.
Presim që të konkretizojmë marrëveshjet me tre prej tyre dhe t’i kemi në dispozicion gjatë përgatitjeve. E dimë që nuk do të jetë e lehtë ngjitja në Kategorinë e Parë, por ne i kemi vënë themelet për të qenë sa më kompetitivë për këtë sezon”, u shpreh Suta.
