Ish prokurorja e Tiranës, Elisabeta Imeraj ka dhënë një deklaratë për mediat pas vendimit të Kolegjit të Posaçëm të Apelimit për shkarkimin nga detyra me arsyen se nuk justifikonte dot pasurinë.
Në fjalën e saj, Imeraj kundërshtoi vendimin e KLP, ndërsa shtoi se ka kërkuar vazhdimisht të di se kush e ka kërkuar shkarkimin e saj. Sipas ish prokurores, ajo nuk ka përfituar pasuri në kurriz të detyrës dhe hodhi akuza se procesi ka qenë i ndikuar që në fillim.
“Pa marrë parasysh asnjë lloj pretendimi të paraqitur nga ana ime, ajo që pretendohet nga reforma në drejtësi është që zëri i secilës palë të jetë i dëgjueshëm. Nuk e lidh këtë me situatën personale me shkarkimin tim. Në mënyrë të përsëritur kam kërkuar të di se kush e dëshironte shkarkimin tim. Shpresoj që ta kenë të arsyetuar se kush kërkon shkarkimin tim nga Drejtësia. Së pari, jeni udhëzuar që të merrni çdo fletë të dosjes hetimore nga të cilat vërtetohet në mënyrë të plotë se Elisabeta Imeraj ka zero pasuri brenda dhe jashtë territorit të republikës së Shqipërisë. Gjithashtu jeni të ftuar të shqyrtoni çdo akt në dosje që lidhen me pastërtinë e figurës time. Puna ime ndër vite besoj se e ka treguar më së qarti sesi është punuar duke u bazuar edhe në rezultatet që janë arritur. Në raport me atë që KPA vendosi është disproporcional. Ajo çfarë reforma në Drejtësi synon është krijimi i një sistemi të pavarur pavarësisht sesa është ndikimi i presioneve politike apo të vëzhguesve ndërkombëtarë të cilët mund të mos ndjerë rehat gjatë këtyre seancave. Kam paraqitur prova që dëshmojnë se ky proces ka qenë i ndikuar që në fillim të tij. Për shkak të marrjes në shqyrtim të denoncimeve anonime të bëra”, tha Imeraj.
Më herët, Kolegji i Posaçëm i Apelimit ka shkarkuar nga detyra kryeprokuroren e Tiranës Elisabeta Imeraj, gjyqtaren e dosjeve të bujshme. Drejtuesja e trupës gjykuese, Ina Rama tha se Imeraj nuk justifikon pasurinë e krijuar ndër vite.
Discussion about this post