Për “Kastrati” Group, kryetarët e bashkive dhe drejtorët nuk pyesin ç’thotë ligji mbi prokurimet, por firmosin menjëherë kontratën. Këtë herë dhuratën e radhës ia ka bërë kryebashkiaku i Shijakut, Elton Arbana. Ky i fundit më datë 2 prill 2024 ka njoftuar tenderin me objekt ‘Blerje karburant për nevoja te Bashkisë Shijak’ dhe fond limit 88 milionë lekë. Mënyra si janë qepur shifrat, kriteret dhe fondi limit, duket sikur i ka formuluar ndonjë menaxher i “Kastratit”.
Deri më datë 12 prill 2024, kur ka qenë afati i fundit i dorëzimit të ofertave janë regjistruar në këtë garë vetëm firmat “Kastrati” sh.p.k dhe “LLUK OIL-DOBRUSHI” sh.p.k. Këtë të fundit Arbana e skualifikoi menjëherë me pretendimin se nuk ka paraqitur kontratat të ngjashme të realizuara me sukses më parë.
Në këtë mënyrë funksionon kjo skemë e stërpërdorur, prandaj oferta e firmës ‘Kastrati shpk” nuk ka hasur pengesë për t’u shpallur fituese.
Duke qenë se nuk kishte konkurrentë përballë, kryetari Arbanaia kaloi kontratën oligarkut të naftës. Edhe pse kaluan dy muaj nga mbyllja e tenderit, kontratat u mbajt në sirtar dhe emri i fituesit është bërë publik vetëm më datë 28 maj 2024.
Sikur të kishte probleme vetëm me transparencën, do të ishte gjysma e së keqes, por prokurimi ka shumë të meta. Kështu, oferta e “Kastratit” është sa 100% e fondit limit duke vulosur mungesën e konkurrencës dhe të efektivitetit të tenderit. Pra kemi një kontratë me aq para sa ka kërkuar “Kastrati”, fituesi shpallet pa garë dhe kontratat mbahet e fshehtë për gati 2 muaj.
Me këto 88 milionë lekë do të blihet brenda një viti 57 742, 7 litra naftë për makinën e Arbanës dhe të stafit të bashkisë Shijak përgjatë vitit 2024.
Nuk e kuptojmë përse përllogaritja bëhet sipas çmimeve të INSTAT, kur vendimi i qeverisë kërkon të merren për referencë vlerat e bursës ndërkombëtare PLATTS të konfirmuara nga Drejtoria e Përgjithshme Doganave. Megjithatë, “Kastrati” nuk e ka problem çmimin pasi mbizotëron tregun me shumicë dhe pakicë të karburanteve. Për krahasim, oferta e skualifikuar ishte 2 milionë lekë më pak se ajo e “Kastratit”, çfarë tregon se ka vend për konkurrencë.
Open Data Albania ka ngritur alarmin duke i vendosur tenderit “Flamur të Kuq”, që tregon riskun e korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post