Bashkia e Shijakut ka hapur një tender në datën 28 dhjetor 2021, për pastrimin, gjelbërimin dhe shërbimin e mirëmbajtjes së varrezave në këtë bashki. Tenderi që mban numrin e referencës REF-16288-12-23-2021, mban një shifër të çuditshme të fondit limit prej 30.993.923 lekë të reja, ose rreth 301 milionë lekë të vjetra. Sipas tenderit, kompania që do të firmos kontratën do të mirëmbajë varrezat për 3 vite.
Pra, Bashkisë së Shijakut i duhen 100 milionë lekë të vjetra në vit, vetëm për mirëmbajtjen e varrezave të qytetit. Kushdo që e dëgjon këtë shifër të lartë, e cila do të shkojë për një punë që mund të bëhet me një kosto shumë më të vogël, do t’i dukej pak anormale. Pasi nëse do i referohemi objektit të tenderit, që është vetëm mirëmbajtja e varrezave, atëherë Bashkisë së Shijakut do t’i mjaftonin dy punonjës me kohë të plotë dhe me një rrogë mesatare, Elton Arbanës do t’i mjaftonin rreth 10 milionë lekë të vjetra në vit për të bërë këtë punë.
Por mesa duket qëllimi i kësaj procedure do jetë për tjetër gjë dhe këtë na e tregon mënyra se si është zhvilluar prokurimi. Në tender ka marrë pjesë vetëm kompania “AMR sh.p.k”, dhe duke mos pasur konkurrent tjetër, është shpallur fituese automatikisht . Kjo është një nga procedurat e radhës të kësaj bashkie, e cila zhvillohet duke mos respektuar parimin e garës. Pra është një nga ato procedurat që konsiderohen me risk, pasi krijon dyshime që bëhen me fitues të paracaktuar. Dhe për këtë “Open Data” e ka cilësuar këtë procedurë me flamurin e kuq, me mbishkrimin e mungesës së konkurrencës.
Me sa kuptohet, Elton Arbana po përdor edhe varrezat e qytetit që të gropos ca miliona lekë nga taksat e qytetarëve për t’i ndarë me miqtë e tij. Ne jemi dëshmitarë që varrezat janë objektivi i fundit i drejtuesve të institucioneve përgjegjëse për t’iu kushtuar rëndësi. Madje mund të themi që më shumë kujdesen emigrantët që jetojnë dhe punojnë jashtë duke kontribuar financiarisht për mirëmbajtjen e varrezave të zonës ku janë rritur, sesa institucionet përgjegjëse. Ndaj ky tenderi i Arbanës duhet parë me shumë interes, se nëse menaxhohen në mënyrë të drejt, me 301 milionë lekë të jep përshtypjen se pas 3 viteve Bashkia e Shijakut do ketë implementuar teknologjinë në varrezat e qytetit, e jo vetëm mirëmbajtjen.
X.S/ Gijotina.com
Discussion about this post