Elton Debreshi ka ngritur padi në Gjykatën Administrative të Shkallës së Parë, lidhur me gjobën prej 50 milion lekësh që iu vendos nga policia me pretendimin se ka shkelur masat anti-Covid për mitingjet e zhvilluara gjatë fushatës.
Kandidati i pavarur në zgjedhjet e 25 prillit, është shprehur se vendimi për gjobitje nuk është i drejtë, pasi ai kishte mbledhur pak persona, ndersa mori shembull kryeministrin Edi Rama dhe kreun e PD, Lulzim Basha që kishin më shumë persona në mitingjet e tyre.
“Më gjobitën se ishim mbledhur pak, siç u mblodh Edi Rama, dhe Basha në fushatë. Ata kërkuan ndjesë dhe unë kërkova, por unë u gjobita. I kërkoj Gjykatës Administrative të Shkallës së Parë t’i shikoj gjërat siç janë dhe të marrë një vendim serioz,” është shprehur ndër të tjera Debreshi.
Debreshi u gjobit me 50 milion lekë gjatë muajit të fushatës pas tubimit që bëri në Bulqizë më 26 Mars duke mbledhur njerëz në fushatën e tij elektorale.
