Elvis Naçi ka vendosur të shesë spitalin që ka në pronësi pas shumë debatesh në media lidhur me mënyrën e dyshimtë se si ai arriti që ta blerë dhe burimin e të ardhurave.
Përmes një postimi në Facebook, Naçi thotë se spitalin do t’ia shesë Kryegjyshatës Botërore Bektashiane për 850 milionë lekë të vjetra dhe paratë premton se do t’ia japë njerëzve të varfër.
Naçi ka qenë objekt i vëmendjes herë pas here ku fokus ka qenë pasuria e tij dhe blerjet e shtrenjta që ka kryer duke fshehur transparencën.
“Sot dua të ndaj nj lajm te bukur, një lagje e re pritet të ndërtohet nga Fondacioni Firdeus ne Kosovë. Kryegjyshata Botërore Bektashiane na beri një kërkesë për të blerë Spitalin Continental me dëshirën për të patur edhe ky Komunitet një Spital si komunitetet e tjera Fetare, përveç kësaj Spitali Continental gjendet në pronën dhe ndërtesën e Kryegjyshatës Botërore Bektashiane dhe dëshira e tyre është që të investojnë në të gjithë zonën dhe pronat e tyre! Fondacioni Firdeus vendosi ta shesë Spitalin Continental me shumë prej 85 milionë (lekë te reja) dhe me fondin e përfituar do te ndërtojë një lagje për të varfërit në Kosovën tonë të dashur dhe disa apartamente në Maqedoni për njerëzit ne nevojë”,shkruan Naçi.
Por, ai ku ka zgjedhur që të mos publikojë asnjë faturë shoqëruese apo marrëveshje të firmosur duke hedhur sërish hije dyshimi mbi këtë lëvizje.
