Ditën e sotme, kryeministri Edi Rama pritet që të dalë para qytetarëve për të prezantuar paketën e masave që do të vihet në zbatim për të menaxhuar krizën energjitike. Kjo paketë do të jetë në mbrojtje të qytetarëve në nevojë dhe të biznesit të vogël për të përballuar efektet që do të ketë kriza energjitike.
Pas një jave nga shpallja e emergjencës energjetike, Rama njofton se në orën 15:00 do të bëjë të ditur planin e qeverisë për përballimin e krizës.
Ditën e djeshme, kryeministri tha duke iu referuar ekspertëve se kriza pritet të arrijë pikun nga mesi i vitit, ndërsa duke përfituar nga situata tha se çmimet nuk do të kthehen më si ishin.
“Ekspertët mendojnë se kriza do të jetë prezente me pikun e kulmin e saj deri në mesin e vitit të ardhshëm dhe njëkohësisht mendojnë se edhe pas kapërcimit të kulmit, çmimet nuk do të kthehen aty ku ishin para krizës. Ajo që na takon ne është që të mbrojmë konsumatorët tanë. Sigurisht me një rend prioritetesh, duke pasur parasysh ata që kanë më shumë nevojë, nga më të dobëtit tek më të fortët”, tha Rama.
Po ashtu, dje u zbardh vendimi i qeverisë për shpalljen e gjendjes së emergjencës për furnizimin me energjinë elektrike, e cila do të jetë në fuqi deri në 15 prill 2022.
Sipas vendimit zyrtar, për menaxhimin e kësaj gjendje është ngritur një grup ndërinstitucional, që drejtohet nga Zëvendëskryeministri Arben Ahmetaj dhe ka në përbërje ministrin e Infrastrukturës dhe Energjisë, Belinda Ballulku, ministrin e Financave dhe Ekonomisë, Delina Ibrahimaj dhe çdo përfaqësues nga institucione të tjera, që vlerësohen të nevojshëm nga zëvendëskryeministri.
Shoqëritë “KESH”, sh.a., “OST”, sh.a., dhe “OSHEE Group”, sh.a., detyrohen të pezullojnë planet e investimeve, përveç investimeve të domosdoshme për ushtrimin e veprimtarive.
