Bullgaria ka vendosur të forcojë kufirin me Greqinë dhe Turqinë, për shkak të shqetësimeve në rritje në Evropë për një fluks emigrantësh nga Afganistani.
“Presioni mbi kufirin bullgar po rritet, gjë që kërkon nga Qeveria të veprojë”, tha ministri i Mbrojtjes i Bullgarisë, Georgi Panayotov. Bullgaria do të shpërndajë në kufi 400 deri në 700 ushtarë. Panayotov tha se ata do të jenë në dispozicion për të ndihmuar policinë dhe xhandarët me “ndërtimin e barrierave dhe me vëzhgim”.
Marrja e kontrollit të Afganistanit nga talebanët ngjalli frikën për një përsëritje të krizës së migrantëve në Evropë, si ajo e vitit 2015, kur më shumë se 1 milion njerëz që iknin nga lufta dhe varfëria në Lindjen e Mesme, arritën në bllok. Shumë prej tyre kaluan nga Turqia dhe morën të ashtuquajturën rrugë ballkanike për të hyrë në vendet më të pasura të BE-së.
Për çështjen e migrantëve afganë, presidenca sllovene e Bashkimit Evropian njoftoi se një takim urgjent i ministrave të Brendshëm të bllokut do të mbahet në Bruksel, më 31 gusht.
