Nuk kanë fund çuditë në Pogradec, ku mbledhja dyditore e qeverisë po shoqërohet edhe nga një tjetër “garë” për të takuar Edi Ramën.
Vetëm një ditë pasi një i moshuar priti rreth pesë orë për të përqafuar kryeministrin dhe për ta falënderuar se i kishte zgjidhur hallet, këtë të hënë është shfaqur një tjetër mbështetës i zjarrtë.
Bëhet fjalë për Halim Bufin, emigrant prej 35 vitesh në Greqi dhe mbështetës të Partisë Socialiste, i cili ka udhëtuar posaçërisht nga Ksanthi drejt Pogradecit.
Sapo ka mësuar se Rama ndodhej në qytet për takimet e qeverisë, Bufi thotë se ka bërë rreth pesë orë rrugë për ta takuar.
Dhe dëshira e tij nuk është e vogël.
“Ta takoj e le të vdes”, thotë ai, ndërsa shprehet se dëshiron ta falënderojë Ramën për atë që e konsideron kontribut të kryeministrit për emigrantët shqiptarë në Greqi dhe çështjen e pensioneve.
“Kam ardhur nga Greqia të takoj Edi Ramën, t’i jap falënderimet e mia që kam si refugjat. Për ne ka bërë shumë punë, 35 vite në Greqi, për pensionet. Tani na ka dhënë lajmin se do na njihen edhe vitet e punës atje. Kam bërë 5 orë rrugë. Jam me Fatos Nanon, i nderuari Fatos Nano. Kam hyrë në burg në ’93, më ka nxjerrë Fatos Nano. Që atë ditë ika në Greqi. Protestat në Shqipëri janë të kota. Kur ishin zgjedhjet, kam siguruar 185 vota. Kam shpresë shumë të madhe ta takoj, ta takoj e le të vdes. Të na rrojë sa malet”, u shpreh Bufi.
Ironia bëhet edhe më e fortë kur këto pamje vendosen përballë atyre që Shqipëria po sheh prej 84 ditësh.
Në njërën fotografi, qindra të rinj në rrugë, duke protestuar prej gati tre muajsh. Në tjetrën, të moshuar që presin me orë për të takuar kryeministrin dhe deklarojnë se “protestat janë të kota”.
Dy breza, dy pamje dhe thuajse dy Shqipëri.
Të rinjtë kërkojnë të dëgjohen nga pushteti në shesh. Të moshuarit presin në radhë për një përqafim me Ramën.
Dhe në Pogradec, për të dytën ditë radhazi, duket se sa më shumë të rinjtë protestojnë për të ardhmen, aq më shumë dalin të moshuar që “vdesin” për Ramën.
Discussion about this post