Protesta qytetare kundër qeverisë ka vijuar përpara Kryeministrisë, ku mes pjesëmarrësve ka marrë fjalën edhe një i ri nga diaspora shqiptare, i cili prej pesë vitesh jeton në New York.
Në fjalën e tij, i riu tha se ishte rikthyer në Shqipëri për t’iu bashkuar qytetarëve që vijojnë protestën dhe që, sipas tij, ende besojnë se vendi mund të ndryshojë. Ai solli edhe përvojën personale të emigrimit, duke folur për largimin e vazhdueshëm të shqiptarëve nga vendi dhe pasojat që ky fenomen ka sjellë për familjet.
Sipas tij, zgjidhja për situatën në të cilën ndodhet vendi është largimi i kryeministrit Edi Rama, ndërsa u bëri thirrje qytetarëve të bashkohen dhe të mos humbasin shpresën.
“Sot dua të flas pak gjatë pasi kam mall, prej 5 vitesh jetoj në New York. Erdha për t’iu takuar juve, ju që ende besoni që ky vend mund të bëhet.
Ju që ende nuk e keni humbur shpresën. Unë pata mundësinë që të vija, por qindra shqiptarë nuk e patën mundësinë. A thua u larguan se menduan se emigrimi ishte i lehtë. Im atë jetonte në Greqi, kur u rritëm, u larguam ne. Kështu ndodh në familjet shqiptare. Kur do vijë dita që ky shtet të mendojë për qytetarin dhe jo pushtetarin. Sot është dita, ju jeni shpresa e kësaj shoqërie.
Kur ne flasim në emër të popullit, na thoni: po ju kush jeni? Ne jemi populli o maskarenj. Ne jemi shoqëria, ne jemi Shqipëria.
Politikanët tanë nuk janë perendi, janë njerëz të përkohshëm. Mos u përkulni ndaj askujt. Zoti e bekoft Shqipërinë.
Discussion about this post