Trashëgimia e Vangjush Dakos në Durrës materializohet në kullat që mbytën parkun arkeologjik dhe tek veliera prej betoni që fsheh bukurinë e torrës së qytetit. Kjo lloj arrogance vërshon edhe në gjakun e krybashkiakes Emiriana Sako, sepse korrupsioni është ADN e pushtetit të korruptuar! Pra, edhe 5 lekë të kenë mbetur nga buxheti, ato do të shkojnë për beton. Sigurisht, jo për shtëpitë e të pastrehëve që la tërmeti, por për trotuare dhe fasada. Kështu, paratë e fundit nga buxheti i bashkisë për vitin 2023, Sako i çon për beton.
Një ditë më parë raportuam se si kryebashkiakja e Durrësit, Emiriana Sako po shpenzon sa qimet kokës për një plak dëbore dhe për të zbukuruar fasadën e bashkisë me drita. Dhe së fundmi, Sako do të blejë 530 metër kub beton për Ndërmarrjen Shërbimeve Komunale Durrës.
Gara është mbyllur më datë 30 tetor 2023 dhe fituesi është shpallur po në atë ditë.
Gjithçka prokurimi u zhvillua shumë shpejt për shkak se nuk pati një garë të mirëfilltë. Siç shohim nga dokumentet, vetëm firma GRIALD SHPK, në pronësi të Gëzim Halilit ka dorëzuar një ofertë sa 99% e fondit limit.
Duke iu referuar ligjit “Për Prokurimet Publike” Sako në këto kushte duhej të anulonte procedurën sepse ligji kërkon që të vazhdojë gara vetëm nëse ka 2 ose më shumë ofertuese. Por, synimi i Sakos është vetëm të çojë fondin tek biznesmenët e paracaktuar.
Në mungesë të konkurrencës, krybashkiakja ia ka dhuruar këtë tender Halilit, i cili ka për detyrë që deri në fund të këtij viti të dërgojë beton tek Komunalja në Durrës.
Duke mos dhënë asnjë sqarim për këto tenderë, se ku shkojnë milionat nga taksat e qytetarëve, ndërkohë Sako blen çdo vit të paktën 40-50 milionë lekë beton.
Beton çdo vit
Vitin e shkuar kryetarja Sako ka nënshkruar po në të njëjtën periudhë tenderin me objekt “Blerje betoni, viti 2022”, konkretisht vetëm për muajin nëntor dhe dhjetor. Sako ka shpenzuar 40 milionë lekë (pa llogaritur TVSH) për këtë kontratë që është firmosur në shkelje të ligjit të prokurimit. Edhe ky tender është dhënë pa garë.
Sipas dokumentacionit edhe pse procedura për këtë tender ka zgjatur 1 muaj, vetëm firma “KORABI 2007” e Shkëlqim Kupës ka paraqitur ofertë. Sako në këtë rast duhet të anulonte procedurën dhe të rishikonte kriteret, që shpesh bëhen shkak për abuzimin me tenderët.
Por, krybashkiakia e Durrësit, duke qenë se në garë ka qenë një privilegjuar i qeverisë, ka firmosur fitoren për Kupën. Kështu, edhe ky tender është dhënë pa konkurrencë dhe 40 milionë lekë janë xhiruar padrejtësisht tek Kupa, me të cilin Sako parashikonte të furnizonte 540 metër kub beton.
Të dy tenderët janë klasifikuar nga Open Data me risk të lartë korrupsioni, prandaj janë shënuar me “Flamurin e kuq”.
Me sa duket, kjo situatë do të vazhdojë të përsëritet, sepse industria e beton-korrupsionit kërkon lëndë të parë, ndërsa SPAK-u është i zënë me “peshqit e mëdhenj”.
Lexo edhe: Sako gati për Krishtlindje, jep 123 MLN lekë për plakun prej dëbore
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post