Në një kohë kur shumë pensionistë dhe familje në nevojë po përballen me vështirësi të mëdha ekonomike, rritja e pagave të drejtuesve të bashkisë së Durrësit, përfshirë kryetaren Emiriana Sakon, ka ngjallur jo pak pakënaqësi në radhët e qytetarëve, veçanërisht pensionistëve.
Ata ndihen të lënë pas dore, duke shprehur shqetësimin se fondet që shkojnë për këto rritje, mund të përdoren për t’i ndihmuar në përballimin e kostove mujore, të cilat vetëm sa po shtohen.
“I ka vajtur 290 mijë. Të mos e marrë aq shumë dhe pak nga ato t’ia japë pensionistëve. Do të jetë dhe më e kënaqur dhe do fitojë më tepër popullaritet Emiriana”, shprehet një qytetare.
“Nuk është mirë fare. Tani dola unë dhe as një kafe nuk e piva se s’kisha as 500 lekë për kafe. Vaj medet se një pension ku del derisa të marrësh tjetrin?! Të na ndihmonte bashkia, jo vetëm të vetët”, shprehet një tjetër.
“Ne dy pensionistë me 350 mijë lekë kalojmë muajin. Aq keq sa s’ka. I lutemi Zotit të na bijë goca 50 euro…Mos t’i japin atyre (drejtuesve më shumë), po të na japin dhe ne të lëpihemi nga pak”, thotë një tjetër.
“Ditë për ditë dalim e rrimë këtu dhe presim. Asgjë s’po bëhet. Pse t’i ndajnë veç?! Drejtuesit veç dhe këta veç. Populli nuk do të hajë? Vetëm këta të mëdhenjtë?! Ktheje nga vetja jote, a të del ty dhe pastaj fol sa do e ngresh”, thotë një pensionist.
Mes rritjes së çmimeve, pensioneve të ulëta dhe mungesës së përkrahjes sociale, ata ndihen të pambrojtur dhe të pafuqishëm.
“Ato të bashkisë i kanë rrogat e veta, po ne nuk i kemi mundësitë t’i plotësojmë kushtet. Shumë dobët. Skandal. S’kam koment të flas për këtë”, shprehet një tjetër.
Discussion about this post