Agjencia e Mbikëqyrjes Policore me vendim të Gjykatës së Elbasanit ka pezulluar nga detyra tre efektivë policie në Elbasan, të cilët akuzohen për veprën penale “Shpërdorimi i detyrës”.
Më konkretisht bëhet fjalë për:
- NënKomisar Theofan Telo, me detyrë Specialist për rendin pranë Komisariatit të Policisë Elbasan
- Inspektor Andeta Liçi, me detyrë Ndihmës Specialiste pranë Zyrës së Informacionit në Komisariatin e Policisë Elbasan
- Inspektor Avni Bahja, me detyrë Përgjegjës i dhomave të sigurisë pranë DVP Elbasan.
Dyshohet se tre efektivët e Policisë, në mospërmbushje të detyrave të tyre funksionale, nuk kanë marrë masa për parandalimin e arratisjes së Nazmi Liçi dhe Ervis Peqini nga dhomat e sigurisë në Komisariatin e Policisë Elbasan. Ndaj këtyre të fundit, Gjykata kishte caktuar masën e sigurisë “Arrest në burg” për veprën penale “Vjedhja me dhunë” dhe do të dërgoheshin drejt burgut.
“Në vijim të veprimeve të thelluara hetimore të kryera nga AMP, dyshohet se këta punonjës policie, në mospërmbushje të rregullt të detyrave të tyre funksionale, me veprime dhe mosveprime, nuk kanë marrë masa për parandalimin e arratisjes nga dhomat e sigurisë / shoqërimit të Komisariatit të Policisë Elbasan, të shtetasve N.L. dhe E.P., ndaj të cilëve Gjykata e Shkallës së Parë e Juridiksionit të Përgjithshëm Elbasan, kishte caktuar masën e sigurisë “Arrest në burg”, të dyshuar për veprën penale “Vjedhja me dhunë”.
Në lidhje me këtë ngjarje, më datë 31/12/2024 Drejtoria Rajonale e AMP-së ka bërë ndalimin me iniciativë për veprën penale “Shpërdorim i detyrës” ndaj punonjësit të policisë Inspektor Dh.D., me detyrë Trupë shërbimi vend roje në dhomat e shoqërimit në Komisariatin e Policisë Elbasan, ndërsa janë proceduar në gjendje të lirë për “Shpërdorim i detyrës” edhe punonjësit e policisë Inspektor A.H., me detyrë Trupë shërbimi vënd roje në DVP Elbasan dhe Inspektor A.B., me detyrë Përgjegjës i Dhomave të Sigurisë në DVP Elbasan”, thuhet në njoftimin e Policisë.
Raportohet se vijojnë veprimet hetimore për nxjerrjen e përgjegjësive për punonjës të tjerë të policisë në Drejtorinë Vendore të Policisë së Elbasanit.
Discussion about this post