Këshilli Bashkiak i Tiranës miratoi sot me 50 vota pro kërkesën për shkarkimin e Erion Veliajt nga detyra e kryetarit të Bashkisë. Vendimi u mor duke iu referuar pikës c të nenit 62 të ligjit “Për vetëqeverisjen vendore”, i cili parashikon largimin nga detyra të kryebashkiakut nëse mungon për më shumë se 3 muaj rresht pa justifikim.
Ironikisht, opozita kishte depozituar më herët dy kërkesa të njëjta për shkarkimin e Veliajt, por këto ishin injoruar sistematikisht nga i njëjti Këshill Bashkiak. Vendimmarrja e sotme erdhi vetëm pas sinjalit të fortë politik të dhënë nga kryeministri Edi Rama më 11 shtator, gjatë Asamblesë së Partisë Socialiste.
Këshilltarët socialistë, dikur mbështetës dhe përfitues të afërt të Veliajt, u rreshtuan pa hezitim kundër tij, duke braktisur një aleat që deri dje e lëvdonin. Për disa, vota pro shkarkimit ishte çmimi për të ruajtur postet në qeveri apo parti; për të tjerë, një akt nënshtrimi ndaj linjës së re politike të Ramës.
Ndërsa pjesëmarrja në votim ishte masive, vetëm pak këshilltarë refuzuan të bëhen pjesë e këtij “shkarkimi kolektiv me porosi”. Lista e firmëtarëve përfshin emra me poste të rëndësishme në administratën qendrore apo të lidhur me interesa të mëdha ekonomike, shumë prej të cilëve të promovuar nga vetë Veliaj.
Shkarkimi i tij nuk është thjesht një akt formal – por sinjali më i qartë se Veliaj është zyrtarisht i braktisur nga struktura që dikur e fuqizoi. Një fund politik që erdhi nga duart e atyre që ai vetë i kishte ndërtuar.
– Endri Fuga, Drejtori i Komunikimit në Kryeminsitri.
– Aldrin Dalipi, Kryetar i Këshillit të Qarkut Tiranë.
– Megi Fino, Zv/ministre e Jashtme dhe Kryetare e Këshillit Bashkiak të Tiranës.
– Eridian Salianji, Shef i Zyrës Jurdike në PS për çështjet zgjedhore dhe përfaqësues në KQZ.
– Sara Shameti, Koordinatore e Ministrisë së Brendshme për Konsultimin Publik të Ligjeve.
– Etleva Bajrami, Zv/Dekane e Fakultetit Ekonomik, Universiteti i Tiranës dhe Këshilltare e Jashtme e Ministrit të Financave.
– Ledia Tota, ish-Drejtore e Agjencisë së Zhvillimit të Territorit dhe Sekretare e përgjithshme e Këshillit Kombëtar të Territorit.
– Sonila Qato, Ish-Drejtreshë e Përgjithshme e Agjencisë së Kthim-Kompensimit të Pronave, ish-Drejtoreshë e Përgjithshme e Rrugëve dhe ish-Ministre e Shtetit për Sipërmarrjen.
– Luan Bregasi, ndërtues, kryetar i shoqatës së biznesit dhe anëtar i Bordit të Agjencisë ë Investimeve; ka marrë fonde shteti e dhjetra leje ndërtimi për kulla, hotele dhe resorte.
– Arta Dollani, ish-Drejtoreshë e Trashëgimisë Kulture dhe Drejtoreshë e Agjencisë së Mjedisit.
– Genci Hyska, Drejtor e Spitalit Obstetrik Gjinekologjik “Koço Gliozheni”-Tiranë.
– Julian Hodaj, Zv/ministër i Brendshëm, anëtar Bordi në Drejtorinë e Rrugëve e 2 borde të tjera.
– Reme Ymer Lala, ish-Deputete e PDIU kaluar deputete e PS dhe Drejtoreshë e Përgjithshme e Shërbimit Social shtetëror në Ministrinë e Shëndetësisë.
– Blerina Doracaj, ish-Drejtoreshë e Përgjithshme e Hipotekave.
– Silda Çepe, ish-Specialiste në Kryeministri, Zv/ministre për Evropën dhe Punët e Jashtme.
– Endrit Hoxha, Zv/ministër i Arsimit.
– Adelina Greca, Drejtore Ekzekutive e Agjencisë Kombëtare të Planifikimit të Territorit.
– Hantin Bonati, ish-Drejtor i “Albcontrol” dhe Zv/ministër i Infrastrukturë-Energjisë.
– Vjollca Braho, ish-Drejtoreshë e Fondit të Kujdesit Shëndetësor, ish-Drejtoreshë e Institutit të Sigurimeve Shoqërore, ish-Zv/ministre e Shëndetësië, aktualisht zyrtare e qeverisë.
– Glindxhet Madhi, Koordinator për projektet “Tirana-Kryeqytet Evropian i Rinisë”, dhe rekrutues të rinjve për në Akademinë Politike të PS.
– Katerina Marku, Komisionere për Energjinë në Bashkinë e Tiranës dhe biznesmene.
– Enio Civici, ish-Zv/ministër i Bujqësisë.
– Agim Kraja, biznesmen ndërtimi, përfitues i miliona euro tenderë, leje ndërtimi e licenca nga qeveria “Rama” dhe i koncesioneve për 7 hidrocentrale private.
– Rezart Isufi, ish-Drejtor OSHEE-Shkodër dhe zyrtar në Drejtorinë e Përgjitshme të OSHEE.
– Endrit Braimllari, ish-Deputet dhe Sekretar i Përgjithshëm i LSI; iu bashkua grupit të këshilltarëve të PS dhe është Zv/kryetar i Këshillit Bashkiak të Tiranës.
Discussion about this post