Konstituohet grupi i dialogut mes mazhorancës dhe opozitës për ligjet që kërkojnë shumicë të cilësuar votash si dhe ligjet e nevojshme për rrugëtimin në Bashkimin Evropian.
Mbledhja u zhvillua në sallën e Komisionit Parlamentar të Ligjeve. Sipas marrëveshjes mes palëve ky grup do të ketë 3 anëtarë nga opozita dhe 3 nga mazhoranca.
Nga Partia Socialiste anëtar janë Damian Gjiknuri, Klotilda Bushka dhe Toni Gogu.
Anëtarët e opozitës do të jenë Oerd Bylykbashi, Dhurata Çupi dhe Erisa Xhixho nga Partia e Lirisë.
Ky grup pritet të marrë vendime me konsensus për ligjet që duan 84 vota, përfshirë Reformën Zgjedhore, për të shkuar drejt votimit në parlament, me dakordësinë e palëve.
Po ashtu një nga ligjet e nxehta është edhe votimi i Amnistisë Penale, nga e cila përfitojnë të mijëra të dënuar.
Nënkryetari i Komisionit të Ligjeve, Oerd Bylykbashi u shpreh se puna që do të bëjë ky grup do të jetë transparente.
“Puna që do të bëjë ky grup dialogu do të jetë transparente, ne do të diskutojmë modalitetet për sa na takon neve si opozitë sigurisht që kërkojmë transparencën maksimale.
Prioritet për opozitën dhe punën është trajtimi i reformës zgjedhore. Amnistia Penale nuk ishte çështje që u diskutua. Ajo që ramë dakord është listimi dhe përcaktimi në një mbledhje tjetër të objektit të punës. Do ndiqen praktikat më të mira. E nevojshme të kemi mundësinë të punohet. Opozita e ka mbështetur gjithmonë amnistinë. Duhet të shohim zgjidhjet konkrete që të arrijë objektivat”, tha deputeti demokrat.
Edhe përfaqësuesi i maxhorancës, Damian Gjiknuri, tha se grupi i punës do të shqyrtojë të gjitha ligjet që kërkojnë shumicë të cilësuar në parlament.
“Dua të them që grupi i punës u konstitua në bazë dhe të vendimit që ka marrë dhe kryesia e Komisionit të Ligjeve për të punaur me konsesus për çështjet që janë prioritare. Mbi të gjitha duke filluar me atë që ka mbetur që janë çështjet e adresimit të Kodit Zgjedhor dhe rekomandimet e OSBE-ODHIR, për të filluar modalitetin e punës për të çuar përpara reformën zgjedhore. Nuk kemi diskutuar për amnistinë sot, por që do të diskutohet dhe do të kalojë me një konsensus”, tha Gjiknuri.
Discussion about this post