Emrat/ Të shtënat me armë zjarri në Thumanë, si u plagosen tre kushërinjtë

Një konflikt për pronën ka agravuar mbrëmjen e djeshme në Thumanë deri në përdorimin e armëve.

Nga ngjarja u plagosën tre persona ndërsa ngjarja ka ndodhur në afërsi të një fabrike çimentoje në Mamurras.

Sahit Ahmetaj (Sela), efektiv policie, Adrian Sela dhe Fatos Sela, kanë përfunduar në spital pasi qëlluan ndaj njëri-tjetrit me armë zjarri, pas një sherri për një pronë që e pretendojnë të tre palët.

Tre të plagosurit mësohet se janë kushërinj më njëri-tjetrin. Ndërkohë është zbardhur dinamika e ngjarjes ndërsa raportohet se Fatos Sela së bashku me vëllezërit e tij ishin duke kryer punime për rrethimin e një sipërfaqe toke, e cila pretendohet edhe nga kushërinjtë e tyre.

Mësohet se në vendngjarje ka mbërritur më pas efektivi i Policisë Rrugore Sahit Ahmetaj (Sela), i cili fillimisht ka debatuar me kushërinjtë e tij, njëherazi edhe fqinj.

Debati mes tyre ka agravuar shpejt dhe efektivi i policisë, i cili sipas autoriteteve ishte jashtë shërbimit ka qëlluar me armë zjarri në drejtim të palës tjetër.

Më pas kushërinjtë e tij kanë qëlluar po ashtu me armë zjarri duke iu kundër përgjigjur. Për pasojë të tre janë plagosur dhe janë dërguar në spital për të marrë kujdesin mjekësor dhe ndodhen nën kujdesin e mjekëve. Sakaq, grupi hetimor po punon për sqarimin e rrethanave të ngjarjes.