Tragjedia e ndodhur në fshatin Pla të Hasit, ku shtetasi Ylber Jaku, 41 vjeç, dyshohet se vrau me armë zjarri Rushit Sallahun, 34 vjeç, ka qenë një ngjarje e paralajmëruar prej kohësh.
Konflikti për motive pronësie mes familjeve Jaku dhe Sallahu vijonte prej më shumë se një dekade, ndërsa institucionet ishin vënë në dijeni përmes mbi 20 kallëzimeve të bëra ndër vite nga familja Jaku.
Sipas burimeve, kallëzimet ishin bërë kryesisht nga babai i autorit të dyshuar, Agim Jaku, i cili në dokumentet zyrtare kishte kërkuar zgjidhje urgjente të konfliktit nga organet e drejtësisë.
Në kallëzimin e fundit, ai kishte paralajmëruar se situata mund të përshkallëzohej në dhunë të rëndë nëse nuk ndërhyhej në kohë.
Vetëm dy ditë para vrasjes, pjesëtarë të familjes Sallahu kanë ushtruar dhunë fizike ndaj prindërve të autorit, Agim dhe Vera Jaku, të cilët ndodhen aktualisht të plagosur në Spitalin e Traumës në Tiranë.
Ata janë prindërit e autorit të dyshuar dhe po marrin trajtim mjekësor për dëmtime të rënda.
Policia ka arrestuar Artjola Sallahun, motra e viktimës Rushit Sallahu, për përfshirje në konfliktin e dhunshëm që parapriu ngjarjen fatale.
Discussion about this post