EMRAT/ Zbardhet konflikti në Peqin, shpallen në kërkim dy autorët

Një konflikt ka ndodhur mes dy personave në Peqin, për motive të dobëta, ku njëri prej tyre me precedent penal, ka qëlluar me armë zjarri në ajër.

Konflikti ka ndodhur gjatë aktivitetit për festat e nëntorit. Sipas informacioneve paraprake dyshohet që kryetari i Bashkisë së Peqinit, Bukurosh Maçi ka ndërhyrë për të shuar konfliktin.

Policia po punon për kapjen e personit që qëlloi në ajër me armë.

Njoftimi i Policisë:

Rreth orës 13:30, në lagjen “Xhami”, dyshohet se gjatë një konflikti për motive të dobëta, ndërmjet shtetasve Leonard Elezi 50 vjeç dhe Adriatik Ceka 40 vjeç, dyshohet se ky i fundit ka qëlluar me armë zjarri, në ajër. Nga të shtënat nuk ka shtetas të dëmtuar.

Menjëherë pas njoftimit, shërbimet e Policisë kanë shkuar në vendngjarje dhe vijojnë krehjen e zonës, me qëllim kapjen e shtetasve Leonard Elezi dhe Adriatik Ceka.

Ndërkaq, grupi hetimor po punon për sqarimin e rrethanave të rastit.