EMRI/ Kush është ‘shefi’ i RENEA-s që u kap me mijëra euro -

Altin Morina 43 vjeç, me detyrë shef në repartin RENEA është kapur me 113 mijë euro në mjetin e tij tip “Audi”, të cilat as nuk ishte munduar që t’i fshihte.

Paratë me prerje euro, shqiptare por edhe paund, i kishte futur të gjitha në një qese supermarketi, duke e vendosur në sediljen e parë.

Paraprakisht dyshohet se paratë ishin produkt i shitjes së lëndëve narkotike, por nuk përjashtohen edhe mundësi të tjera.

Kjo pasi dyshohet gjithashtu që në mjet me të ka qenë edhe një person i dyshimtë, që mendohet se ka pasur lidhje në masakrën e Don Boskos, e cila ndodhi pak ditë më parë.

Njoftimi i policisë:

“Finalizohet nga Forca e Posaçme “Shqiponja” operacioni policor i koduar “Fast”, falë inteligjencës informative.

Vihet në pranga për pastrim të produketeve të veprës penale, fshehje e të ardhurave dhe shpërdorim detyre një 43-vjeçar, punonjës policie në Repartin Renea. Sekuestrohen në cilësinë e provës materiale shuma të madhe në euro, paund e lekë shqiptare. Mesditën e sotme, falë inteligjencës informative se një shtetas (punonës police), qarkullonte me automjet tip “Audi” dhe kishte me vete sasi të konsiderueshme parash, menjëherë shërbimet e Forcës së Posaçme “Shqiponja”, kanë organizuar dhe finalizuar operacionin policor të koduar “Fast”.

Në kuadër të këtij operacioni, te Kodra e Diellit, shërbimet e Forcës së Posaçme Shqiponja kanë konstatuar dhe shoqëruar në ambientet e DVP Tiranë automjetin e dyshuar sëbashku me drejtuesin e tij shtetasin A. M., 43 vjec, banues në Tiranë, me detyrë Shef i Stërvitjes te Reparti Special Renea.

Gjatë kontrollit dhe kryrjes së automjetit rezultoi se në serdiljen e pasagjerit, në vendin e parë të automjetit, ndodhej një qese plasmasi brenda të cilës kishte lekë, euro dhe paund. Nga numërimi rezultoi se në qesen e palsmasit kishte rreth 113 mijë euro, rreth 290.00 lekë të rinj dhe 80 paund, të cilat u sekuestruan në cilësinë e provës materiale. Në përfundim të veprimeve të para hetimore të kryera nga strukturat hetimore të DVP Tiranë u bë arrestimi në flagrancë i shtetasit A. M., dhe materialet i kaluan Prokurorisë së Rrethit Gjyqësor Tiranë për veprime të mëtejshme për vepra penale “Pastrimi i produkteve të veprës penale ose veprimtarisë kriminale”, “Fshehja e të ardhurave” dhe “Shpërdorimi i detyrës””, njofton policia.