Kandidati për Këshillin Bashkiak të bashkisë së Durrësit Skënder Kapiti i cili garonte nën logon e Partisë Demokratike, e drejtuar nga kryetari i komanduar Enkelejd Alibeaj ka braktisur garën.
Skënder Kapiti do i bashkohet fushatës elektorale të Igli Carës, kandidatit të koalicionit “Bashkë Fitojmë” për zgjedhjet e 14 majit.
Zbulohet se brenda Partisë Demokratike ka pasur edhe debate, ndërsa ky nuk është largimi i parë i kandidatëve të Alibeajt nga kjo garë.
Dy ditë pas skadimit të afatit në KQZ, nuk dihet ende se sa është numri i kandidatëve të regjistruar nga Partia Demokratike e drejtuar nga Enkelejd Alibeaj.
Pas mbledhjeve të gjata të fundjavës, Alibeaj mundi të dalë me një kandidat për Tiranën, Roland Bejko. Bashkë me të kryetari në detyrë i Partisë Demokratike deklaroi se do të futet në garë edhe për të paktën 19 bashki të tjera.
Por të nesërmen e kësaj deklarate të Alibeajt, listat e kandidatëve për kryetarë bashkish, por edhe për këshilltar kanë filluar të firojnë. Janë 5 bashki, në të cilat kandidatët ose janë tërhequr ose në momentin e fundit nuk janë aprovuar nga kryesia.
Në Korçë dhe Lezhë kandidatët janë tërhequr. Gjergji Gjata u tërhoq bashkë me 40 kandidatët për këshillin bashkiak të Korçës për shkak se u ndje i tradhtuar nga lidershipi i partisë në Tiranë, ndërsa Sandër Marku në Lezhë ka vendosur të mos futet në garën e 14 majit, për shkaqe ende të paqarta.
Sakaq, Genc Doçi në Kurbin, Bujar Vreto në Librazhd, dhe Ibrahim Bruka në Vorë nuk janë aprovuar si kandidatura nga kryesia e PD edhe pse më herët ishin prezantuar si kandidatë në bashkitë përkatëse.
Tkurrja e kandidaturave të Alibeajt në zgjedhjet lokale të 14 majit pritet të vijojë edhe më tej me disa kandidatë që janë duke e rishikuar vendimin e tyre për tu futur në garën e 14 majit.
Discussion about this post