EMRI/ Makina përplas për vdekje të moshuarën shqiptare në Itali

Një aksident tragjik rrugor ka shkaktuar vdekjen e një 75-vjeçareje mbrëmjen e djeshme në Porcari të provincës së Luccas në Itali.

E moshuara me origjinë shqiptare, banuese në zonë, po kalonte në këmbë rrugën “Puccini”, kur u përplas nga një makinë që drejtohej nga një vajzë e re.

Fatkeqësisht, me gjithë ndërhyrjen e menjëhershme të një ambulance, nuk u bë e mundur t’i shpëtohej jeta. Mediat lokale shkruajnë se viktima është Feime Besnik Nurce, e cila u godit nga një automjet tip Volksëagen Golf.

Pas goditjes së fuqishme, gruaja përplasi kokën në tokë duke gjetur vdekjen e menjëhershme.

Sipas ekspertëve të policisë, 75-vjeçarja po ecte përgjatë një aksi rrugor pa trotuar dhe me ndriçim të dobët, kur vendosi të kalonte rrugën.

Në atë moment po mbërrinte e reja që drejtonte makinën Golf dhe për arsye që ende janë nën hetim nga policia, nuk mundi të shmangte përplasjen me të moshuarën. Nga goditja 75-vjeçarja është hedhur disa metra larg, duke humbur menjëherë ndjenjat për shkak të një dëmtimi shumë të rëndë në kokë.

Me ardhjen e stafit të urgjencës, gjendja e saj ishte e dëshpëruar dhe nuk mund të bënin asgjë për ta shpëtuar. Mjekut që ndodhej në ambulancë, pas një tentative të dëshpëruar për reanimim, nuk i mbetej gjë tjetër veçse të deklaronte vdekjen.